Shillong, Risaw 31 : Kumba 22 haduh 25 tylli ki Eklavya Model Residential School (EMRS) hapoh ka jylla ki dei ki bym pat sdang ban tei na ki 38 tylli ki EMRS. Kiba dang dep tei ki long tang 2 tylli bad kiba sah ki dei kiba dang ïaid ka jingtrei, ïathuh u Myntri ka tnad pule puthi u Rakam A Sangma mynta ka Sngi Palei.
Haba kren sha ki nongthoh khubor u Rakam u la ong “ Nga kyrmen ba hapoh kine ki shisnem ban wan ngin sa ïohi ba kin sa don ki jingkylla bad yn sa ïohi ba kine ki EMRS kin ïeng bad lah ïoh ban pyndonkam”.
Kumba long mynta ka sorkar ka thaw ki lad ki lynti kumno ban pyndep trei noh ïakine ki EMRS hapoh ka jylla. U la ïathuh mynta ïa ka jingtei ïa ki EMRS la aiti noh sha ka sorkar jylla namar baroh shi katta ka kam kam tyllun namar la peit da ka MTDC jongka Manipur.
U la ïathuh ruh ba ki don ki jaka jaka ba ym lah ban tei ïa ki EMRS namar bym ïoh jaka puta.
“ Ngi la bthah ïa ki DC, ki ophisar bad ki BDO ban pynbeit ïa kane ka kam namar na ka liang ka sorkar pdeng hi ka ai ïa kine ki skul halor ka nongrim ba ka jaka dei ban ïoh ei. Hynrei hangne namar ka jaka ka dei jong ki riew shimet kumta shem jingeh ban ïoh ïa ka jaka khlem da hap siew dor kumta na kata ka daw ka sorkar ka dang thaw ki lad ki lynti halor kane kumno ban leh ban ïoh tei noh ïa kine ki EMRS hapoh ka jylla.
