SHILLONG, Risaw 18: Ka Salesian Youth Movement (SYM) ha ka 18 tarik Risaw, 2024 (sngi Thohdieng) ka la wan shakhmat ban pynbna ba kan sa pynlong ïa ka lympung Basketball kaba la tip da ka ‘SYM Open Club Basketball Championship 2024’ na bynta ki Shynrang bad Kynthei ha Shillong.
Kane ka dei ka bynta ba san (5th edition) ban pynlong ïa kane ka Championship. Kane ka lympung kan long 7 sngi lynter ha kaba yn sdang ïa ka naduh 21 tarik haduh ka 27 tarik mynta u Risaw, 2024, ha madan Basketball kaba ha St Anthony Higher Secondary School, Laitumkhrah-Shillong.
Kumban shu kdew, ka Salesian Youth Movement (SYM) ka la sdang ban pynlong ïa kane ka lympung naduh u snem 2019 bad mynta ka kynti kan dei ka bynta ba san ïa ka kynhun ban pynlong ïa kane ka championship ha nongbah Shillong.
Ka jingthmu haba pynlong ïa kane ka lympung ka long ban kyntiew ïa ka jingïatreilang bad ka imlang ka sahlang bad ban pynroi ïa ka sap jong ki khynnah samla kiba ieid bad sngewtynnad ïa ka basketball.
Haba ïakren bad ki la pathai khubor, u samla Renaldy Jyrwa – Sports secretary jong ka SYM, u la pyntip ba ki kynhun ban ïashimbynta ki kynthup 12 tylli ha ka liang ki shynrang, ha kaba la phiah ha ki saw tylli ki Group kiba mar 3 kynhun, katba ki kynthei ki don 7 kynhun ba la phiah 3 kynhun ha kawei ka Group bad saw kynhun ha kawei pat ka Group.
Nalor ki kynhun Basketball na jylla la khmihlynti ruh ïa saw tylli ki kynhun (ar kynthei bad ar shynrang) kiba na shabar, kum na Kolkata, Bangalore, Rajasthan bad na Mizoram ki ban wan ïashimbynta ha kane ka Championship ha Shillong. Napdeng kine ki kynhun, ka lahduh jong ki kynthei ha ka lympung Basketball jong ka ri kan sa wan ïashimbyntalang ha kane ka lympung katkum ka jingpyntip na ka SYM.
La pyntip ruh ba ka song khusnam barohlang (Shynrang bad Kynthei) na bynta kane ka Championship kan long 3lak.
