Nongpoh, Naiwieng 14: Kumba 21 ngut ki Field Assistant bala dep ïa ka jinghikai ba 11 bnai na Conservation of Training Institute Byrnihat kiba dei ruh ki 51st Batch Field Assistant Trainees 2024-25 mynta ka sngi ki la shah pynkup burom ha ka Passing out Ceremony bala pynlong da ka tnad Soil and Water Conservation jong ka sorkar Meghalaya bala pynlong ha auditorium ka CTI Byrnihat.
Ha katei ka jingïalang pynkup burom ïa kitei ki samla kiba la pyndep ïa ka jinghikai la wan ruh ban shim bynta da u Bah L Shabong Director ka tnad Soil and Water Conservation kum u kongsan ha ka jingdonlang ki heh ophisar na ka tnad Soil and Water Conservation ka jylla, lem bad ki bahaiing ha sem jong kitei kiba la dep shah pyntbit na katei ka jaka ai jinghikai.
Haba kren ha kane ka sngi na ka liang u Bah L Shabong kum u kongsan u la ai ka jingïaroh ïa kitei ki 21 ngut ki Field Assistant kynthei bad shynrang kiba la pyndep hok ïa ka jinghikai bapher bapher ha kaba ïadei bad ka jingsumar bad pynneh pynsah ïa ka mei mariang na katei ka jaka ai jinghikai kaba paw ha ka jylla shuwa ba kin mih bad ban leit treikam sha ki tnad bapher bapher, kumba ha kane ka batch nalor ki samla na ka jylla Meghalaya u la don ru uwei u samla na ka jylla Arunachal Pradesh.
U la ong kyntu ruh ïa baroh 21 ngut kiba la pyndep ïa katei ka training ba kin pyndonkam hok ïa ka jinghikai, ka jingstad, ka jingtip bad ka buit kaba ki la ïoh na katei ka jaka ai jinghikai bad ban pyntreikam ïa ki sha ki shnong ba ki leit, khamtam ban sumar bad pynneh pynsah ïa ka mei mariang, ki tyllong umbam umdih na ka bynta ka jingkiew shaphrang ha ka jylla.
Ha katei ka sngi la sam ruh ïa ki syrnod bad ki khusnam sha kitei ki 21 ngut ki samla kiba la wan shakhmat bad khur ïa ki marks ba heh ha ka exam bad training, ka kam lehkai sports bad kiwei kiwei.
