Shillong, Nailar 1 : Ka election MLA ha u 2023 kan long kaba kham pher namar ba la nang bun ki seng saiñ pyrthei thymmai ki ban ïa ai reng nyngkong ha ka jylla kata kum ka TMC, VPP bad khlem pep ha katei ka election ka National Peoples’ Party (NPP) kaba ïalam ïa kane ka sorkar Meghalaya Democratic Alliance (MDA) kan hap ban ïakhun pyrshah ïa baroh ki seng saiñ pyrthei haka jylla namar khlem pep ki phai khmat bad ther beit baroh baroh ïa ka NPP hynrei wat la katta ruh ki nongïalam ka NPP kim don jingkhuslai, jingtieng ne jingriej namar ki la pynpaw ba ki la long kiba la pynkhreh lypa ban ïakhun bad ïasei nia ha kino kino ki rynsan halor ki jingshisha.
Ki ban ther ïa ka NPP kim long tang kiba don shabar ka sorkar hynrei khlem pep wat kine kiba don ha ka sorkar ruh kin ther kylla beit na rynsan namar la paw lypa ki dak ki shin kum ka BJP, UDP bad kiwei kiba la sdang lypa naduh mynta. Nangta wat ka Congress ruh khlem pep kan ther beit ïa ka NPP kaba ïalam ïa ka sorkar.
Hynrei haba ïakren bad u Symbud Myntri Rangbah (Dy.CM) uba long ruh u National Vice President ka NPP u bah Prestone Tynsong da ka mynsiem kaba sngewskhem u la ong “ Ngi tip shai kdar ba baroh baroh kin phai khmat bad ther beit ïa ka NPP hynrei ngim salia bad ngim khuslai namar ngi la long kiba la pynkhreh lypa. Ka NPP ka la pyndep bun ki kam ba la kular hakhmat ki paidbah bad kata shwa kawei na ki daw ba ki paidbah ki la ïohi aiu ka NPP ka la heh ym tang ka nia hynrei ka pyndem da ki kam ruh hapoh kine ki san snem”.
Ym lah ban len hapoh ka jingïalam jong ka NPP ki don bun shisha ki kam kiba la leh kum ka jingpynbeit ïa u pud u sam bad ka Assam kaba la ïaid shaphrang. Ha kine ki snem ba la leit noh, man ka election ki party ki buh beit ïa kawei na ki mat ha ka manifesto jongki ban pynbeit beit ïa u pud u sam bad ka Assam, ynda la kut ka election la klet bad ym ju poi shano shano ruh la 50 snem mynta. Dei ka NPP kaba la pynpaw syndon da ki kam wat hapdeng ki jingshah kynthoh kiba bun na ki seng saiñ pyrthei.
Kumba la dep pynpaw naduh mynshwa ba ha ka jingpynbeit ïa u pud uba la sahteng la 50 snem mynta kan don beit ka jingïa ai bad ïashim kylliang kumta kane ka jia hi tangba wat la katta ruh na ka liang u Myntri Rangbah u Conrad K Sangma ula dep pynpaw ba 90% na ki shnong ki thaw ki la wan phai sha ka jylla Meghalaya bad kiba sah yn dang ïa pynbeit ha ka wat kaba ar.
Wat la ka TMC ka la kynnoh ba ka sorkar MDA ka la ai ei ïa ki jaka puta sha ka Assam, hynrei na ka liang ka sorkar MDA ka la pynpaw ba ïa ka jingïapynbeit pud la ïeng nongrim ha ki kot ki sla bad map ba la ai da u Dr Mukul Sangma sha ka Assam ha ka por ba u long u Myntri Rangbah ka jylla ha u 2011 mynba u dang don ha ka Congress bad ïa ka jingpynbeit pud la pynshong nongrim beit ha kitei ki kot ki sla ym dei ba la wanrah thymmai da kiwei.
Kiwei kiwei ki kam kiba ka sorkar MDA hapoh ka jingïalam ka NPP ka la leh ka long ka jingpynkhreh ban pynkynriah ïa ki Harijan ne ki Kharmetor ba ïatip baroh shi katta na them ïew Mawlong sha kiwei ki jaka ïa kiba ka sorkar ka dang wad jaka haduh mynta.
Dei ruh ha kane ka sorkar ba la wanrah da ka Resolution hapoh ka ïing Dorbar Thawaiñ halor ka ILP, ka ktien Khasi bad Garo ban rung ha ka Khyrnit kaba Phra bad bun kiwei kiwei ki mat kiba ym lah ban jer lut .
Dei halor kine ki mat kiba u Symbud Myntri Rangbah ka jylla u bah Prestone Tynsong u sngew skhem ka nongrim ba ka NPP ka la long kaba la pynkhreh ban ïather ha rynsan ha u 2023 da kaba kren biria “ Ngi la pynbiang bha ïa ki kuli ban ïather ha u 2023 khnang ban wanrah ka jingjop don burom ha ka jylla bad ïoh bat marwei ïa ka jingsynshar”.
