200 ngut ki samla pule pynkup burom ha ka JSM da ka Academic Excellence Award 2025

Khliehriat, Nailur, 21: Ka Jaiñtia Students Movement (JSM) ha ka sngi Saitjaiñ ha ka sien kaba hynñiew ka la pynkupburom ïa ki 200 ngut tam ki samla pule na rilum Jaiñtia kiba la pas bha ha ki eksamin ba kynthup ka eksamin SSLC bad HSSLC da ka 7th Academic Excellence Award 2025 ha ka jingïalang kaba la long ha District Library Mynthong, West Jaiñtia Hills District.
Ha kane ka sngi, u Superintendent of Police, West Jaiñtia Hills District u Jagpal Singh Dhanoa u la long kum u kongsan ryngkat ka jingdonlang jong u Superintendent of Police ka East Jaiñtia Hills District u Vikash Kumar bad kiwei kiwei ki heh Pulit kiba la shah khot sngewbha.
Haba kren kum u kongsan, u Jagpal Singh u la ai ka jingïaroh ïa ka JSM kaba la shim ïa kane ka sienjam ban pynkupburom ïa ki samla pule bad kaba la ai ka jingshakri ïa ka imlang ka sahlang. U la ai mynsiem ïa ki samla pule kiba shah pynkup burom ba kin nang treishitom shuh shuh ban poi sha ka thong.
U la kren bad pynshai ruh ïa ka jingïapher ha kaba ïadei bad ki jingpule ba ïoh na ki shlem ai jinghikai bad ki jingtip ne jingpule kiba ïoh na shabar ki shlem jingpule. U la kyntu ïa ki samla pule ban long kiba lum jingtip lyngba ki kotkhubor, ki kot bapher bapher khnang ba kin ïoh jingtip shuh shuh bad kane kan ïarap shibun eh ïa ki ha ki jingpule.
U Vikash Kumar haba kren ha ka jingïalang u la kyntu ïa ki samla pule ba kin nang ïai trei shitom shuh shuh bad ong ruh ba ai ba kane ka jingshah pynkup burom kaba ki la ïoh pdiang kan long ka pansngiat ïa ki bad kan long ka jingai mynsiem ïa ki ban trei shitom ban poi sha ka thong.
U Bah J.Mairom haba kren ha ka jingïalang pynkupburom ïa ki samla pule u la ong ba ka jingduk bad ki jingeh kim lah ban khanglad ïa kito kiba thrang ban poi sha ka thong. U la ong ruh ba kine kiba shah pynkup burom ki dei shisha ki khynnah kiba stad kiba lah ban wan ha ki kyrdan kiba shakhmat ha ki jingpule. U la pynshlur bad ai mynsiem ïa ki ba kin nang ïaibteng shuh shuh ïa ki jingpule jong ki haduh ba kin da poi sha ka thong kumba ki thmu.
U ïaroh ïa ka JSM kaba la trei na ka bynta ka bha ka miat ha ka imlang ka sahlang namar ki dkhot jong ka JSM ki dei kiba ju mih shakhmat bad ai snam ei ha ki Blood Donation Camp bad u la ai mynsiem bad pynshlur ïa ki dkhot ka seng ba kin nang bteng ban leh ïa kane ka kam ba bha kaba long ka jingmyntoi ïa ka imlang ka sahlang ïa kiba pang ba shitom kiba donkam kyrkieh ïa ka snam.
U President jong ka JSM u Bah Leningstar Rymbai u la pynkynmaw ba kane ka jingpynkup burom ïa ki samla pule ka long halor ka jingthmu ban ai mynsiem bad pynshlur shuh shuh ïa ki samla pule ba kin nang kiew shaphrang ha ki jingpule jong ki bad ba kin poi sha ka thong ha ki kurdan pule bapher bapher ha ki jingpule jong ki.
La pynbyrngia ïa ka prokram da ki jingshad tynrai na ki khun samla na Nartiang.