200 klur yn mang ban shna ïa ka surok Sutnga-Saipung-Khahnar-Samasi Road : MLA Sutnga

Khliehriat Risaw 15: Ka MLA jong ka Sutnga Saipung Constituency, ka kong Santa Mary Shylla mynta ka sngi ha ka jingïalang ba la khot pynlong da ka CLF Saipung East Jaiñtia Hills District ka la noh syniang T 2 lak tyngka sha kane ka CLF kum ka jingsdang ban shna ïa ka ophis treikam jong ka Saipung Circle CLF Women Multipurpose ha Saipung bad kane ka kynhun ka dei kawei na ki Co-operative Society ha East Jaiñtia Hills District kaba la kiew bha bad mynta ka sngi kane ka CLF ka la pynlong ïa ka jingïalang ba kyrpang, ka 1st Annual Meeting ha Saipung ha kaba ka MLA ka ka la long kum ka Kongsan.
Ka kong Santa Mary Shylla ha kane ka jingïalang mynta ka sngi ka la pynsngew ruh sha ki paidbah jong ka thaiñ Saipung ba ïa ka mang tyngka kaba hapoh T200 klur kaba ka sorkar ka dang pynkhreh mynta na ka bynta ban shna ïa ka surok Sutnga-Saipung-Khahnar-Samasi Road kaba ha ka jingjngai kaba 64 kilo mitar bad mynta ka sorkar ka dang pynkhreh ïa ki kot ki sla bad la khmihlynti ba ha u bnai nohprah jong une u snem yn sa ioh ban pyntrei noh ïa kane ka surok.
Kum ka kongsan, ka la ai ka jingkhublei kitbok ktrwiang ïa ka Saipung Circle CLF Women Multipurpose kaba la kiew shaphrang ha ki kam ki jam jong ki bad ka la kyntu bad pynshlur ruh ïa ki kum ki longkmie ba kin ïai long kiba treishitom ha ki kynhun SHG jong ki bad ai mynaiem ruh da kaba ong ba ka jingtrei shitom jong ki ka don la ka nong ba bha ha kawei ka sngi, namar ha ka kynhun SHG ki bun bha ki kam bad na ka liang ka sorkar ruh ka ju ai ki skim iarap ïa ki kynhun, ka kyntu ba ki dei ban da pyndonkam bha ïa ki skim ki ban long ka jingiarap ïa ka ïing ka sem jong ki bad ruh ka ban kynnkiew ïa ka ioh ka kot, ka khaiï ka pateng ha ka thaiñ “Ngi iohi ba ka thaiñ Saipung ka dei kawei ka thaiñ kaba don ruh ïa ka mariang kaba itynnad bad ha ka khaïi ka pateng pat ka dang duna bha ha ka thaiñ bad nga kyrmen ba ha ki snem ki ban wan ka khaïi ka pateng ruh ka kiew khamtam lada ioh ïa ka surok kaba bit ba biang ha ka thaiñ” ong ka Kongsan.
Ka kongsan ka la ong ruh “ Wat na ka liang u Myntr rangbah ka jylla, u Conrad Sangma u la shim ïa ka synjam ban kyrshan bad iarap ïa ki khun kynthei bad ïa kane yn shim ïa ka jingiarap bad jingiatreilang jong ki SHG, ki CLF bad kane kan long kum ka skim jing iarap ha kiba bun ki bynta, kane ka jingleh jong u myntri rangbah ka dei kaba ha ka jinglut kaba da ki klur tyngka”
Ka la pynpaw ruh ka jingsngew kmen ba ha kane ka Saipung Circle CLF Women Multipurpose ka don shisha ka jingiatylli, ka jingiatreilang ban kyntiew ïa ki kam ki jam bad kyntiew ruh ïa ka ioh ka kot jong ki paidbah ha ki shnong ki thaw.
Kum ban shu bynrap, ka Saipung Circle CLF Women Multipurpose ka dei ka shlem treikam jong ki kynhun Self Help Group jong ki shnong kiba hap hapoh ka Saipung C&RD Block bad ha kane ka CLF ka don 29 tylli shnong kiba na ka thaiñ Saipung bad ki don ruh haduh 212 tylli ki kynhun SHG.
Ïa ka prokram la sdang da ka jingdwai na u Waheh Shnong Saipung, u Lalniama Kungte bad kiba la ai jingkren ha kane ka jingialang ki kynthup u BPM-NRLM Saipung &RD Block, u bah Amonrious Nongtdu, ka DFS-SISD (NRLM-EJHD), ka kong Iban Marboh, u dkhot shnong Saipung, u bah H.W.Fowler Darnei, ka Vice President Saipung Circle CLF Women Multipurpose, ka kong Niangi Nampui bad kiwei kiwei, la ioh ruh ia ka jingshad tynrai jong ki Biate na ka kynhun jong ka Saipung Village Organisation.