200 ki Innova sha ki nongniah Tourist 200 ki Pick Up trok sha ki nongrep yn ïarap ka sorkar

Shillong, Jymmang 28 : Ka sorkar jylla ka la pynkhreh ban pynïaid da ki Bus Ilektrik ban kit ïa ki riew paidbah bad da ki Bus ban kit ïa ki khynnah skul khnang ban pynduna ïa ka jingdheng kali ha ka jylla. Nalor kata ka la rai ruh ban ïarap ïa ki nongñiah tourist taxi da kaba yn pynthied 200 tylli ki kali Innova bad ïa ki nongrep ruh 200 tylli ki Pick Up da kaba ai subsidy 50 % na ka liang jongka sorkar bad ïarap ruh ban pynïoh ram na ki Bank, iathuh u Myntri Rangbah ka jylla u Conrad K Sangma.
Kane ka long kum shi bynta ban pynïar ïa ka jingpyntreikam ïa ka Meghalaya Integrated Transport Project (MITP) ha ka jylla bad ka sorkar ka la buh thong ban pyntreikam ïa kine hapoh ka 45 sngi ïathuh u Myntri Rangbah.
U la ong ha kaba nyngkong eh yn pyntreikam ïa ki Ilektrik Bus ban kit ïa ki paidbah ha kane ka nongbah Shillong bad ïa kiwei ki Bus na ka bynta ban leit on leit shaw ïa ki khynnah skul namar lyngba kane kan ïarap ban pynduna shikatdei eh ïaka jingdheng kali ha kane ka nongbah. Na ka bynta kane ka sorkar kan pyntreikam shwa khyndiat ki bus bad hadien lada ka ïohi ba ka long kaba seisoh kan sa thied shuh shuh ïa ki bus.
ïa kine ki Bus yn sa aiti ban pynïaid ha kino kino ki kynhun ne ki Agency da ka sorkar khnang ba kin long kiba ïaid beit ïaid ryntih. Halor kane ka sorkar kan dang pynkhreh sani bha kumno ban pyntreikam ïa kine ki bus ong u myntri rangbah.
U la ong “ Kiba bun ki skul kim treh ban pynïaid da ki bus na kata ka daw ka sorkar kan thaw da kane ka lad ba kan pynbiang ïa ki bus bad ban aiti ha kino kino ki seng ne kynhun ban peit bad pynïaid pat ïa kine ki bus”.
Nalor kane khnang ba kan long kum ka jingïarap ban ai kam ai jam ïa ki samla ka sorkar ka la rai ruh ban thied shwa 200 tylli ki kali Innova ban aiti pynïaid ha kito ki kynhun ba pynïaid ïa ki tourist taxi khnang ba kin ïoh ban kit ïaki nongwankai sha kane ka jylla da ki kali kiba bha. ïa kine ki kali ka sorkar kan ïarap 50 % kum ka subsidy.
“ Ngin ai sha ki samla ne kito ki kynhun kiba pynïaid ïa ki tourist taxi da kaba phah ïaki ban aplai da ki form bad ka sorkar kan sa bishar shwa ban ai. Ngi la leh khnang ïa kane khnang ba ki nognwan jngohkai sha kane ka jylla kin ïoh ban pyndonkam da kine ki kali bha haba ki kwah ban leit sha kino kino ki jaka bad kane kan long ruh kum shi bynta ban kyntiew ïa ka kam jngohkai ha kane ka jylla” ong u Myntri Rangbah.
Nalor kata khnang ban ïarap ïa ki nongrep ba kin ïoh ban kit ïa ki mar rep jongki sha ki ïew ki hat ka sorkar ka la rai ruh ban thied 200 tylli ki trok pick up ban ai sha kino kino ki kynhun ne ki seng ba peit ïa ka kit ka bah na ka bynta ki nongrep. ïa kane ruh ka sorkar kan ïarap ban pynthied 50% kum ka subsidy. Nalor kane kan ïarap ruh ban pynïoh da ka ram na ki bank khnang ba ki kynhun nongrep kin ïoh lad ban thied ïa kine ki kali.