20 tarik yn mih paidbah ha nongbah Shillong ba pynkylla ïa ka MNREGA sha VB-G RAM G
Pynlong ka Umsning Block Congress ïa ka General Body Meeting
Nongpoh, Rymphang 18 : Ka Umsning Block Congress Committee hynnin ka miet ka la pynlong ïa ka General Body Meeting ha shnong Umdihar, kum ka jingïalang kyrpang ban ïakren bad ki nongkitkam jong ki unit bapher bapher kiba hap hapoh ka Umsning Constituency.
Ha kane ka jingïalang la wan shim bynta u President ka Meghalaya Pradesh Congress Committee (MPCC), u Bah Vincent H. Pala, uba la synran lang da u Bah Manuel Badwar, Secretary ka MPCC, ka Kong Joplyn Shylla, State President ka Mahila Congress, u Samla Norbet Jana Nongbet, General Secretary ka Meghalaya Youth Congress, u Bah Rocky Marwein, President ka Ri-Bhoi District Congress Committee, lem bad ki dkhot na ki unit bapher bapher.
La ïathuh ba ha kane ka jingïalang la pynleit jingmut halor lai tylli ki mat kiba kongsan ba kynthup ïaka jingpynkhreh ban jied ïa u President ba pura jong ka District, ban pynshai paidbah halor ka jingpyrshah jong ka party ïa ka jingpynkylla ïa ka skim MGNREGA sha ka VB-G RAM G bad ban pyntip ïa ka jingïakhih paidbah kaba ka party kan pynlong ha ka 20 tarik Rymphang ha Nongbah Shillong ban pyrshah ïa katei ka jingpynkylla, bad ban ïawer ïa ki paidbah ban wan kyrshan.
Haba kren sha ki lad pathai khubor hadien ka jingïalang, u Bah Vincent H. Pala u la ong ba ka party ka la don ka jingthmu ban jied ïa u President ba pura jong ka District, bad ki nongïalam na Delhi kin sa wan ban ïakynduh ïa ki nongïalam bad nongkyrshan ha ki block bapher bapher ban bishar bñiah shwa ban shim ïa ka rai.
U la bynrap ruh ba ka Congress ka sngew donkam ban pynshai paidbah halor ka skim 100 sngi, kaba u la ong ba ka sorkar BJP ka la pynkylla sha ka VB-G RAM G, watla ka dei ka skim kaba la wanrah da ka Congress naduh mynshwa.
Ha kaba kut, u Bah Pala u la khot bad wer ïa ki paidbah ka Ri-Bhoi bad ka jylla baroh kawei ban wan sha ka jingïakhih ha ka 20 tarik Rymphang ha Shillong ban pynpaw ïa ka jingpyrshah. U la ong ba lada ki paidbah kin ai jingïatylli bad jingkyrshan, ka sorkar kan hap ban pyrkhat biang halor ka jingpynkylla ïa ka skim MGNREGA.