Jowai, Ïaïong 16: Ka Seng Khihlang kumba ju long manla u snem kan pynlong ïa ka lympung ba 35 ha Laitryngew kaba hap hapoh ka Seng Khasi Sohra Circle.
Ïa kane ka Lympung yn sdang naduh ka 18 tarik bad ban pynkut ha ka 20 tarik mynta u bnai.
Ïa u mawbynna sahnam jong ka lympung yn leit rah na Seiñ Raij Umladkhur War Jaiñtia ha ka 18 tarik bad ka lynti ïaid u mawbynna ka long na Umladkhur, Demthring, Sohmynting, Moodymmai haduh ban da poi Laitryngew. Ka por leit rah ïa u mawbynna kan long naduh ka por 7:00 baje mynstep.
Ka Seng Khihlang ka khot sngewbha ïa baroh ki khun ka bri u Hynñiewtrep Hynñiewskum na ki tnad seng Khasi bad Seiñ Raij bapher bapher ba kin wan sha ka lympung jong ka Seng Khihlang.
Ha kane ka Lympung yn ai ïa ki kyntien sneng na ki Waheh Wasian, ki nongïalam jong ki tnad Seng Khasi bad Seiñ Raij. Ha kajuh ka por ka Seng Khihlang ka khot sngewbha ba ki Dalloi, ki Syiem bad ki President/ Secretary jong ki tnad Seng Khasi bad Seiñ Raij ban wan sha kane ka lympung.
