Nongstoiñ, Naitung 12 : Ka Ïingkashari Special Judge (POCSO) ka West Khasi Hills, ka la hukum ban set phatok haduh 20 snem ïa uwei u riew bymman u ba donkti ban leh beijot ïa kawei ka samla lud ba dang 15 snem ka rta.
Kane ka jingjia ka la jia ha ka 13 tarik Lber ha ka shnong kaba hap hapoh ka Mawshynrut Police Station. Ki Pulit ki la register case ha Mawshynrut PS bad hadien la aiti ïa ka jingtohkit sha ka Women Police Sub Inspector L.Siangshai kaba dei jong ka Nongstoiñ Women Police Station.
Une u briew u ba leh beijot ïa kane ka samla lud u kyrteng u Dilshad Nianglang. Ïa ka ejahar la pyrshah ïa une u briew la mudui da ki ba haïing hasem jong kane ka samla lud. Ka Investigating Officer ka la charge sheet ïa kane ka case hapoh ka kyndon 506 IPC r/w kyndon 5 (n)/6 POCSO Act.
Ka Ïingkashari POCSO ha ka 6 tarik Naitung, ka la pynmih ïa ka hukum hadien ba bishar ïa baroh ki sakhi satar, ban det phatok haduh 20 snem ïa u Dilshad ryngkat ka kunba ba T.30,000 katkum ka kyndon 6 jong ka POCSO Act bad ka jingset phatok ba shisnem ryngkat ka kunba ba T.10,000 halor ka kyndon 506 IPC. Kine ki jingpynsajïa kin ïaid lang ha kajuh ka por.
