Nongstoiñ, Risaw, 05: Ka Ïingkashari Special Judge (POCSO) Nongstoiñ, ka la hukum ban set along haduh 20 snem lem bad ka kuna ba T.20,000 hajar ïa uwei u briew uba leh be-ijot ïa kawei ka khynnah ha u snem 2020.
Une u runar u kyrteng u Khrawbor Kharmaw, 24 snem ka rta, u dei na ka shnong Porla, West Khasi Hills.
Kane ka jingleh be-ijot ka la jia ha ka 22 tarik Naitung 2020 bad ki bahaïing ki la ujor da ka ejahar ha ka 16 tarik Nailur 2020 ha Nongstoiñ Police Station. Na ka liang ki Pulit ki la register case hapoh ka kyndon 3(a)/4 jong ka POCSO Act.
Ka Ïingkashari ha ka 27 tarik Nailur 2024, ka la pynmih ïa ka hukum ban set along 20 snem ïa une u runar lem bad daiñ kuna T.20,000 hajar bad lada um lah siew un hap ban shong along sa 6 bnai.
