Nongstoiñ, Rymphang 5: Ka Ïingkashari jong ka Hon’ble Court of Special Judge (POCSO) Nongstoiñ, ka la rai pynrem ïa u Darling Nonglang, u ba la shah ujor hadien ka kam leh beijot jong u ïa ka khynnah kynthei katkum ka ‘Nongstoiñ PS. Case No. 49(10)2021 U/s 5(1)(n)/6 of POCSO Act with section 351 of BNS’.
U Superintendent of Police ka West Khasi Hills u la ïathuh ba ha ka 2 tarik Risaw 2024, ki pulit ki la ïoh ïa ka jingujor ba u Darling Nonglang u la leh ïa ka kam beijot ïa kawei ka khynnah rit. Hadien ba la ïoh pdiang ïa ka jingujor, ki pulit hapoh ka jingïalam jong u UBSI Evenezer Marbaniang jong ka Nongstoiñ Police Station, ki la sdang shait shait ïa ka jingtohkit.
Hadien ka jingïai tohkit la charge sheet ïa ka mokotduma bad la wanrah hakhmat u Hon’ble Court of Special Judge (POCSO) Nongstoiñ ban shim ka jingbishar. Na ka liang ka Ïingbishar ba don burom ha ka 11 tarik u Nohprah 2025, ka la rai ban pynrem ïa u Darling Nonglang ha kaba u hap ban shong phatok 20 snem kynthih ryngkat ka kuna kaba 50 hajar tyngka.
Nangta la rai ruh ba un shah set sa hynriew bnai ka Simple Imprisonment katkum ka 5(1)(n)/6 jong ka POCSO Act. U la shah rai pynrem ruh katkum ka Section 351(2) BNS, ha kaba u hap ban shong along biang sa shi snem ryngkat ka kuna ba 10 hajar bad lada um siew un hap shong phatok biang sa 4 bnai kynthih.
