20 sien yn siew ka Sorkar ban pynkhuid ïa ka ram ba 565 klur jong ka MeECL ha ka NTPC

Shillong, Risaw 18: Ka Sorkar jylla ka la shim ïa ka rai ban siew dep noh ïa ka ram ba 565 Klur tyngka jongka Meghalaya Energy Corporation Limited (MeECL) ha ka National Thermal Power Corporation (NTPC) bad ïa kane ka ram yn siew dep noh haduh 20 sien siew.
ïa katei ka jingtyrwa jong ka tnad Bording la mynjur da ka jingïalang jong ka Kynhun Myntri kaba la ïalam da u Myntri Rangbah ka jylla u Conrad K Sangma kaba la long mynta ka sngi Balang.
Haba ïakren bad ki nongthoh khubor hadien ba la wai ka jingïalang, u Myntri ua khmih ïa ka tnad Bording u AT Mondal ula ong ba ka tnad ka la ïaid ban ïakren bad ka NTPC hadien ba ka la don ka jingkiew jong ka pisa sha ka T. 665 Klur kaba sahteng ban siew bad lada ailad beit ba kan bteng shen kan sa kynjoh sha ka T.1000 Klur bad kan pynmih ïa ka jingeh kaba khraw ïa ka Meghalaya Power Distribution Corporation Limited (MePDCL) Meghalaya Energy Corporation Limited (MeECL) bad ïa ka Sorkar Jylla.
“Hadien ba la dep ban iakren khah khah, kumta kila mynjur ban siew noh ïa ki T.565 Klur ha ka jaka jongka T.665 Klur. Kumta ngi la sngew sting ha kaba ïadei bad katei ka bynta hynrei ïa katei ka pisa hap ban siew lyngba ka Installment ne ban siew pyndep khyndiat khyndiat haduh 20 sien” ong u Mondal bad ka bynrap ba ka NTPC kala mynjur ban map noh ïa ka T. 100 Klur bad mynta ka don ka lad ban pynhiar ruh ïa ka sut.
Ula ong ba ka MeECL kam long kaba khlaiñ ha kaba ïadei bad ka jingdon ka pisa ka tyngka bad kumta ka sorkar jylla ka la shim ïa ka rai ban siew ïa ka pisa kaba T.565 Klur sha ka NTPC.
“Ngi dang ïaid hapdeng ka jingïakren sngewthuh jingmut bad ka NTPC ka long kaba kloi ban ïakren pynbeit, hato ïa katei ka pisa yn hap ban siew hapoh ka jingsiew 20 sien ïa ka Installment ne ngi lah ban pynjynsur ha kaba ïadei bad ka jingsiew Installment khnang ba kan pynduna ruh ïa ka jingkit kaba khia. Kumta ngi kwah ba shisien ba ka kynhun myntri ka la shim ïa ka rai, kumta kan plie ia ka lad ban lah ban kiew sha ka 30 ne ngin ïakren ban pynbun shuh shuh bad ba kan ym don shuh ka jingshim sut ïa katei bad ngin pyndep ïa katei ka pisa kaba sah sha ka NTPC bad ban khuid noh ha kaba ïadei bad ka jingsahteng ban siew ïa ka pisa jong ka NTPC” ula ong.
Ula pyntip ruh ba kham mynshwa ka sorkar jylla ka la shim ïa ka ram lyngba ka Atmanirbhar bad la siew 50% ïa ka pisa kaba dang sah kaba kot T.488 Klur sha ka NTPC.
“Na ka T.488 Klur, ngi la siew T.244 Klur bad mynta kaba sah kala long noh T.665 Klur. Lada kam don ka jingïakren katei ka pisa kan dang kiew shuh shuh bad kan pynlong ïa ngi ban poi sha ka jingkyrduh pisa bad ban lait na katei ka jingjia, kumta ka sorkar ka la long kaba kloi ban pdiang ïa ka jingtyrwa jong ka tnad Bording” ula ong.
Ula ong ba katei ka jingjia kala mih ka dei namar ka jingsoi ïa ka jingïatehkular hapdeng ka sorkar jylla bad ka NTPC ha u snem 2007.
“Ka NTPC ka la shim ha ka dor kaba rem. Ngi la kren ïa ki ban pynduna ïa ka sut bad ïa ka dor kaba ki la buh hynrei kitei kiei kiei baroh kim shym la urlong. Hadien kane, ngi la leit ruh sha ka ïing bishar hynrei namar ba la ïa soi ïaka jingïateh kular la pyndonkam bad pyntreikam wat ka ïing bishar kam shym la ai ïa ka rai ka ban long na ka bynta jong ngi” ong u Myntri ka tnad Bording.