Shillong, Jylliew 10 : Ka Sonam Raghuvanshi, ka briew ba pyniap klep ïa la u jong u kurim ba dang shu dep ïathoh shongkurim dang 12 sngi, u Raja Raghuvanshi, ka la thong pisa haduh 20 lak tyngka ïa ka kynhun nongpyniap briew ba kin shim noh ïa ka jingim u Raja.
Ka Sonam kala ïasuhbuit ban leh ia kane ka kam bymman bad la u jong u samla ba kala ïa ieid la katto katne snem uba kyrteng u Raj Kushwaha.
U Raja Raghuvanshi, uba pynïaid ïa ka kam kamai kali na Madhya Pradesh, ula ïathoh bad ka Sonam ha ka 11 tarik Jymmang.
Kat kum ka jingïathuh ki kynhun tohkit, ka jingïasuhbuit ban pyniap ïa u Raja ka la sdang naduh ka 16 tarik Jymmang, tang san sngi ba dep ban ïathoh shongkurim. Ka Sonam kala kular ïala u baieid ba hadien ka jingiap u Raja, kan sa long ka thei iap lok bad kan sa ïathoh pat sa bad u, da ka jingkyrkhu lang jong u Kpa.
Ka Sonam kala buh jingmut ban ïathoh shongkurim ia u Raj Kushwaha hadien ba kala kylla long ka thei iap lok. Kala ong ha u Kushwaha : “To ngin pyniap ïa u Raja bad ngin leh ha ka rukom ka ban ïohi kum ka kam lute. Hadien ba nga la long thei iap lok, u Kpa jong nga un sa ai jingmynjur ïa ka jingïathoh jong ngi” kala ong ha u, ïathuh ka khubor.
Ki Pulit kila ïathuh ba ki tiar ba pyndonkam ban pyniap ia u Raja, ka wait, ka dei kaba la shu order online ha Guwahati. Kine ki nongpyniap kila bud ïa kine ki shijur naduh Guwahati bad kila sah ha ka hotel ba jngai tang da ki kilometre na ka homestay ba ki sah hashuwa ban leh ïa kane ka kam bymman. Ka dei ka Sonam kaba la pyni lynti ïa ki sha ka jaka ba ka don bad u kurim lyngba ka GPS.
Ha ka jingtohkit, la ïohksai ba ha ka 23 tarik Jymmang, ha ka nam ban ïashondur, ka Sonam kala khroh ïa u Raja ban leit sha ka jaka pynïeng kali ha Kshaid Wei Sawdong kaba kynjah jar jar. Arngut na ki runar kila jam lypa shakhmat bad ap ïa u Raja katba ka Sonam ka la ïaid suki suki bad dei haba ïohi ïa ka jingbym don briew, kala pyrta “pyniap ïa u”.
La ïathuh ba u Vishal Chauhan ula pduh da ka wait na ka khlieh katba uwei pat u runar u Akash Rajput, ula ap na jngai da ka thuk thuk ban peit briew khnang ban nym don ba ïohi.
Haba nyngkong, kine ki runar kila pynpaw ïa ka jingartatien ban leh ïa kane ka kam namar ka jingthait na ka jingkiew ïa ki mawkyndon ka Nongriat hynrei ka Sonam kala thong ia ki haduh 20 lak tyngka ba kin pyndep noh ïa ka kam. Ka Sonam kala ai ruh ïa ka pisa 15,000 tyngka na ka bek pisa u Raja kum ka advance.
La ïathuh ba hadien kane ka jingpyniap, ka Sonam kala phet na Shillong sha Guwahati ha kane ka juh ka janmiet. Kala kiew ha ka rel bad ïaid lyngba ka Varanasi sha Ghazipur, haba pynjulor ruh ïa ka mobile phone ban nym don ba lah ban lap ïa ka.
Wat hapdeng kine ki jingpyrshang ban pynduh pyndam ïa ki dien jong ka, ka jingdonkti jong ka Sonam kala mih pyrthei na ka jingïoh ring video CCTV ba pyni ba ka ïaphone bad ïa phah msg bad ki suba nongpyniap bad ruh ïa ki record phone briew ba ka phone sha u Raj Kushwaha, ïa kaba la shem ba u don ha Indore. ïa une u briew la kem pat hadien.
Haba sngewthuh ba kam don jaka shuh ban phetrieh, ka Sonam kala khuslai jur bad khatduh kala hap ban wan pyndem ha Nandganj Police Station Ghazipur District ha Uttar Pradesh.
