Tura, Naitung 1 : Ka ïing Bishar ba kyrpang kaba shim bishar ïa kiba shah pynngat ha ka aiñ Protection of Children from Sexual Offences (POCSO) jongka West Garo Hills bad kumjuh ruh ka ïing bishar District Session Court ka la rai pynrem ban set phatok ïa ki arngut ki briew kiba leh beijot ïa ki khynnah rit ïa u wei 20 snem ryngkat ka kuna ba 25 hajar tyngka bad ïa uwei pat 7 snem ryngkat ka kuna ba 10 hajar tyngka.
Ka ïing Bishar POCSO kaba ha Tura ha ka 27 tarik ka la rai pynrem ïa u Rasthy A Sangma ba u donkti ban lehbeijot ïa kawei ka khynnah da kaba un hap ban shong phathok haduh 20 snem ryngkat ka kuna ba 25 hajar tyngka. Lada um lah ban siew ïa katei ka kuna un hap ban bteng shong phatok sa hynriew bnai hadien ba kut katei ka 20 snem.
ïa une u briew la kem naduh u 2020 namar katei ka jingleh beijot jongu ïa kawei ka khynnah ha la ïing jongu. Nalor kane ka dang don sa kawei ka case ba u la shah pynngat kaba ïadei bad ka kam lehbeijot hi ïa ka khynnah rit.
Kawei pat ka jingjia ka dei ka jingshah leh beijot jong kawei ka khynnah rit ha u Beatbeat Ch Marak bad ïa une ruh la rai pynrem da ka ïing bishar da kaba un hap ban shong phatok haduh 7 snem lynter lem bad ka kuna 10, 000 tyngka. Une u briew ym tang ba u leh biejot ïa ka khynnah hynrei ula byrngem ruh ban shim ïa ka jingim jongka lada jia ba ka phla hano hano ïa ka jingshah leh jongka ha u. Une u briew u la leh ïa kane ka kam naduh u bnai Risaw 2016 ha ka por ba katei ka khynnah ka dang leit sha jaka rep ban leit kheit jhur.
ïa kine baroh ar ki case la shimti ban tohkit bad bud dien da ki ophisar Sub Inspector kynthei ka Salmey R Marak bad ka Renu D Momin bad namar ba ka jingtohkit kaba bniah jongki bad ki jingpynngat kyndon ruh ki long kiba khlaiñ kumta kine baroh arngut ki runar ki la ngat ha ki bor ka aiñ bad hap ban shong phatok da ki bun bun snem.
Na ka liang u SP ka West Garo Hills u V.S Rathore u la ai ka jingïaroh ïa ka jingtohkit bniah kine ki ophisar kynthei bad kumjuh ruh ïa u public prosecutors uba long kum nongsamaria ba bha ban ïarap ïaki pulit ban pynngat kyndon ïa kine ki runar.
