Jowai Rymphang 02: Ban pyrto ïa ki kam ba bha kiba u Bah Damian S War u leh na ka bynta ka shnong kum u Waheh Shnong ka Dorbar Shnong Namdong-B West Jaiñtia Hills District, ka shnong ka la ai ka jingkyrkhu kyrdoh ban pyneh bok ïa u na ka bynta ka Election MDC da kaba synñiang jingïarap T. 2 lak.
Ka shnong ha ka jingïalang paidbah hapoh ka jingïalam u Assistant Waheh Shnong Bah A. Sumer, u Secretary Shnong Bah R. Lipon bad ki dkhot ka Executive Committee ki la synñiang ïa kane ka pisa ar lak tyngka sha u Waheh Shnong u Bah Damian S War uba long ruh kum u kyrtong jong ka UDP na Mynsngat-Khanduli Constituency.
La pynsngew ba kane ka jingsynñiang pisa sha u kyrtong ka long kum ka dak ban pynskhem shuh shuh ïa ka jingkyrshan ba pura, khnang ba un jop ba donburom ha ka elekshon sha ka Ingdorbar Thawaiñ ka Jaiñtia Hills Autonomous District Council (JHADC) ka ban sa long ha ka 21 tarik mynta u bnai.
