Shillong, Jylliew, 18: U MDC jong ka Mawlai Constituency u Bah Teiborlang Pathaw ha ka sngi Saitjaiñ u la plie paidbah ïa ka kamra ba la pynkha na ka bynta ban shet jingshet hapoh ka Indoor Sports-cum-Ccommunity Hall jong ka shnong Mawlai Phudmuri ïa kaba la mang pisa lyngba ka skhim Excluded Area jong ka Khasi Hills Automonous District Council (KHADC)
Ha kane kajuh ka sngi u MDC u la aiti ruh ïa ka Work Order kaba T.2 lak ban shna ïa ka paiñkhana ha kane ka jaka kaba u la pynïoh lyngba ka skhim Goods and Service Tax (GST).
Haba ai jingkren ha ka jingïalang, u Bah Teibor u la ong ba kum u MDC u pyrshang ban wad ïa ki lad ki lynti bad ka jingïoh jong u ïa ka skhim ka long hadien ba u la wad jingtip bad lap ba ka don ka skhim jong ka Sorkar Pdeng halor ka ‘Swacch Bharat Abhiyan.’
U la ïathuh hadien ba u la ïoh jingtip halor kane ka skhim u la leit ban ïakynduh ïa u Commissioner jong ka GST, Meghalaya ban pynsngew ïa ka jingdonkam jong ka shnong bad khlem da shim por na ophis GST u la ïoh ïa ka Work Order kaba T.2 lak ban shna ïa ka paiñkhana.
Ha kane ka sngi la sakhi lang da u Acting Rangbah Shnong jong ka Mawlai Phudmuri, ki nongïalam ka Seng Longkmie, ki Seng Samla bad ki nongkitkam shnong.
