Shillong, Naitung 25: U Myntri Rangbah ka jylla u Conrad K Sangma u la sngap ïa ki jingeh jong ki longkmie kiba la tymmen bad rangbah napoh ka thaiñ Ampati kaba ha South West Garo Hills bad mardor u la mang ka pisa kaba T. 2 lak ban shna ïa ka ïing ban shongkai. Kane kadei kaba u la kular dalade ha ka jingleit jngoh ïa ka ha shnong Monabari ha u snem 2018.
Katei ka longkmie kaba la tymmen ka la pynpaw ïa ka jingsngewkhia hapoh ka prokram CM-Connect kaba la long ha Ampati ha ka sngi Palei ha kaba ka la ïathuh shaphang kane ka jingdawa bad ki jingkular ba la ai da u Myntri Rangbah ban mang pisa ïa katei ka jingdawa jong ka. Hadien ba la sngap ïa ki jingujor jong ka, ka kynhun jong u Myntri Rangbah bad ki bor pynïaid ki la lap ba ka la don ka jingmang pisa kaba la ai sha katei ka shnong hynrei ym don pat kiba leit shim ïa ka cheque bad kumta ïa katei ka pisa ka la phai biang sha ka sorkar ha ka snem 2019.
Kumta kum ka jingïarap kaba mardor u Myntri Rangbah u la bthah ïa ka kynhun jong u ban pynlait noh ïa katei ka pisa kaba T. 2 lak na ka bynta ban shna noh ïa katei ka ïingshongkai bad na ka liang katei ka longkmie ka la pynpaw ïa ka jingkhublei ïa u Myntri Rangbah uba la sngap bad pynurlong ïa ka jingkwah jong ka, ha ka jingïalang paidbah na ka bynta kane ka prokram CM-Connect kaba la long hapoh ka Betasing C&RD block kaba ha madan lehkai kaba don ha Ampati.
Lah ban ong ba ïa katei ka cheque la ai na ka bynta ka Riphingkona Village Organisation. Ha kane ka prokram ka la don ruh ka jingpynpaw na ka liang ki paidbah ïa ki jingsuki ki rukom pyntreikam ïa ki skhim, ba slem ki jingtei, ka jingbym biang ka kam sam um, duna ki top pynlang um, ka jingbym biang ki surok bad ki jingbym lah ban pynurlong ïa ki jingkular jong ka sorkar ha ka por mynshwa. Halor kine baroh u Myntri Rangbah u la pynpaw ka jingkmen ban ïohsngew ïa ki jingsngewkhia ki paidbah bad u la ong ba un sa shimkhia halor kine kat kaba lah ban leh eiei.
Haduh 3 kynta ki nongshong shnong ki la ïoh ban ïakren bad u Myntri Rangbah bad kylli ruh kiba bun ki jingkylli ha kaba ki heh ophisar ki la thoh lut ïa baroh ki jingeh ba la pynpaw da ki paidbah. U Myntri Rangbah shuh shuh u la ong ba ka rynsan CM-Connect ka la pynlah ïa ka sorkar ban sngewthuh ïa ki jingeh ba la mad da ki paidbah bad ban lah ban pynbeit ïa ki jingduna. “Ban kyntiew ïa ki kam pynroi bad ka rukom im jong ki nongshong shnong kumta la sngewthuh bad da ka jingtuklar kaba rit ka la wanrah ka jingïapher kaba heh ha ka jingim jong ki briew bad da kaba pynbeit ïa ki jingduna yn sa lah ban kyntiew ha baroh ki liang ki rukom synshar,” u la ong.
