Shillong, Naitung 14 : Ka Ryntih Sports Club ka la ïoh ïa ka work order kaba 2 lak tyngka na u MLA ka Mawlai Konstitwensi u Bah Process T Sawkmie, katba ka Mawtawar SC ka la ïoh 50 hajar tyngka, ki nongïalehkai Calisthenics, ka Seng Samla Mawiong Umjapung Dong Tariang A bad u bah Alexshon Mylliem Umlong uba ïalehkai armwrestling ki la ïoh ïa ka song pisa kaba u la aiti ha ophis treikam jong u Mawlai Nongpdeng hynne ka sngi Palei.
Ha kane ka juh ka sngi u MLA u la aiti ruh ïa ki tiar shet tiar tiew sha ka shnong Umsaw Mawjynrong kaba u la mang na ka bynta baroh ki dong kiba don hapoh kane ka shnong ha ka jingdon ryngkat u Rangbah Shnong bah R. Mawthoh bad kiwei.
Ïa kine ki jingïarap u MLA u la mang na ka MLA skhim ka jong u ka Special Rural Works Programme (SRWP).
Na ka liang ka Ryntih ka kynhun kaba shim bynta ha Shilllong Premiere League la mih khmat da u bah Wanlam Kharpran, uba long u manager kane ka klob. Na ka Mawtawar SC kaban iïakhun ïa ka 2nd Division jong ka Shillong Sports Association la shimti da u rangbah shnong bah Cornelius Kharkongor ha ka jingdon ryngkat ki nongkitkam ka club bad ki nongkitkam shnong.
Na ka Calisthenics kaba dei ka jingialehkai thymmai u la aiti ïa ka song pisa ha u Wantei Hadia bad Rehearsal Jones Hynñiewta ki ban leit shim bynta ha ka jingiakob kaban long ha Pune ha ka 17 tarik mynta u bnai Naitung. Kumban shu kdew kane ka dei ak jait jingïalehkai ba la ju leh ïa ki push up, kiba ïa syriem ïa ka rukom lehkai gym, gymnastic bad kiwei.
U bah Alexshon Mylliem Umlong u la ioh ia ka song jingïarap na ka bynta ka jingleit ïakhun kti jong u sha Uttar Pradesh. Katba ka Seng Samla Mawiong Umjapung dong Tariang A, ka la ïoh ïa ka jingïarap na ka bynta ban pynlong ïa ka jingïakob khwai dohkha ba la aiti ha u bah DB Shangpkiang.
Haba ai jingkren u bah PT Sawkmie u la pynpaw ïa ka jingsngewkmen ban don byntalang haba kyrshan ïa kine ki sport Club bad baroh kiwei kiba la ïoh jingïarap bad u la ong ba ka dei ka bynta jong u kum u nongmihkhmat ban kyrshan ïa kiba donkam jingïarap hapoh ka thaiñ.
Ha kane ka sngi la ïoh ruh ïa ka jingkren na bah Homer Kharkongor, bah Teibok Kharkongor, bah R. Mawthoh rangbah shnong ka Umsaw Mawjynrong, Bah Cornelius rangbah Shnong Mawtawar, bah Wantei, bah Rehearsal, bah Alexshon, bah DB Shangpliang, bah Wanseng Jyrwa ba pynïaid ïa ka jingïalang bad bah Alex Lynser, Working President ka UDP Mawlai ba ai ïa ki kyntien ai khublei.
Baroh kiba la ïoh jingïarap ki la ai khublei bad pynpaw ïa ka jingsngewnguh ïa u bah PT Sawkmie bad ki la kitbok ruh ba un jop bad wanphai biang kum u MLA hadien ka ilekshon MLA 2023.
