Shillong, Nailar 01: Ka Shnong Mynriah, ka jngai kumba 2 kynta na Mawkynrew. Ban poi sha kane ka Shong ym pat don surok satia bad hap ban ïaid da ka kjat lyngba ki lum ki wah bad ki khlaw ki btap.
Ha kane ka shnong don iwei i Meirad iba la 86 snem ka rta, uba don hapdeng ka jingshitom kaba jur namar ka jingpang BP. Hynrei ka jingjngai ka lynti ïaid bad ki khohruh khohram, kam shym la khanglad ïa ki dkhot jong ka Village Health Council (VHC) Mynriah ban pynpoi ïa ine u Meirad sha jaka sumar, da kaba shu bah bad rah ruh ïa ki ha ka Stretcher.
Da ka jingïatreilang bad ki bor pynïaid ka Mawkynrew PHC, la pynpoi ïa ine i Meirad sha jaka sumar, nyngkong ban ai jingïarap ha Mawkynrew PHC bad hadien ba la ïoh jingïarap na kane ka PHC, la pynkit pat ïa i sha Ganesh Das Hospital na ka bynta ka jingsumar kaba kham bha.
Hynrei kaei kaba mih na kane ka jingjia, la ong ki Doktor jong ka Mawkynrew, kadei ka mynsiem ïarap bad ka mynsiem jingkitkhlieh jong ki dkhot ka VHC na Mawriah, kaba ym tang ba ka la pyllait ïa ine I Meirad na ka jingpang jingshitom, hynrei kan long ruh ak nuksa kaba bha ïa ka jingïatip lem bad ka mynsiem ïarap ïa ki briew kiba don hapdeng ka jingpang jingshitom.
