2-0 kol pynliem ka Iran ïa ka India ha ka jingïakhun sdang jong ka Tri-Nation Women’s Friendly ha Shillong

Shillong, Risaw 21 : Ki ar kol kiba ioh ban khyrwit da ka Sara Didar ka la pynlong ïa ka Iran ban khur ïa ka jingjop ha ka jingïakhun sdang jong ka Tri-Nation Friendly Football Tournament pyrshah ïa ka kynhun ïalehkai phutbol jong ka India ha ka jingïakhun kaba long ha JN Stadium, Shillong ha ka janmiet sngi Ba-ar.
Ïa kine ki kol, ka Didar ka la ioh ban thep ha ka minit kaba 64 bad 74 jong ka kylla miet hapdeng ka jingïakhun kaba itynnad bha. Watla ka India ka la pyrshang bun bha ki lad bad ioh ruh katto katne ki kabu ksiar pynban kam shym la lah satia wat tang ban pynkhih jar shisien ruh.
Ha kane ka lympung kaba don lang ruh ka kynhun ïalehkai jong ka Nepal, ka long kum shibynta ban pynkhreh na ka bynta ka lympung ïalehkai jong ka AFC Women’s Asian Cup 2026.
Ka kynhun ïalehkai ka Ri kan pynkhreh pat mynta ban ïakhun pyrshah sa ïa ka Nepal ha jingïakhun kaba lai bad kaba khatduh kaban long ha ka 27tarik mynta u bnai. Katba ka Iran pat kan hap ban kynduh aireng biang sa ïa ka Nepal ha ka 24tarik.