Jowai, Nailur 10: Ka lympung ïalehkai phutbol jong ka kyrdan 1st Division League 2025 bala pynïaid daka East Jaiñtia Hills District Football Association (EJHDFA) kaba la long hynne ka sngi Balang (10 tarik Nailur, 2025) ha madan Artificial Diengshynrum, Khliehriat.
Haba phai sha ka jingïakhun kaba nyngkong jong kane ka sngi, ka Rymbai Synrangshahkhain SC kala pynliem noh da 4-1 kol ïa ka Rymbai Madan Pynriang SC. ïa kitei ki kol na ka bynta ka Rymbai Synrangshahkhain la thep da u Lalgugin Latjem (20 & 90+2’), u Ferdinand Nongtdu (68’) nangta bad u Seigaohao Dimngel (81’). Na ka liang jong ka Rymbai Madan Pynriang SC ka la ïoh ban pynphai shikol ïa kaba la thep da u Rimiki Rymbai ha ka minit kaba 35’.
Katba haka jingïakhun kaba ar ka Sutnga Mission SSCC kala jop da tang 1-0 kol ïa ka Mukhaialong SCSC. Ka shi kol kaba la thep da u Carmon Suja haka minit ba 87 ka la biang pura ïa ka Sutnga Mission SSCC ban khur ïa ka jingjop.
La pyntip ba ka jingïakhun kan bteng mynta ka sngi 11 tarik u Nailur ha ki ar tylli ki jingïakhun.
