Shillong, Lber 31: Ka Sawmer SC ka pynliem da 2-0 kol pyrshah ïa ka Umhyrnai SC ha ka lympung ïalehkai First Division ba pynïaid da ka Shillong Sports Association (SSA) ha ka jingïalehkai ha ka sngi Palei ha madan MFA Ground, Polo, Shillong.
Haba phai sha ka jingïakhun hapdeng kine ki ar tylli ki team ka jingïalehkai ka long kaba itynnad bad ïakhaid bha. Ha ka kylla step baroh ar ki kynhun kila ïakhun tyngeh ban thep kol hynrei haduh kaba kut ki 45 minit ki khlem ïoh ban ïathep kol.
Haba wanphai pat sha ka jingïakhun jong ka kylla miet, ka jingïalehkai kala nang thnem ha baroh arliang, ki rangïalehkai ka Sawmer SC kila pashat bol ha ka rukum kaba itynnad bha bad pynlehnoh ei ruh ïa kiba bun ki kabu thep kol.
Ka Umphyrnai SC ruh khlem da ailad kala ïakhun tyngeh beit triang ban thep kol hynrei sniewbok kam lah ban pyndep ha ka liang ka thep kol. Hapdeng ka jingïakhun kaba shongshit bha, u Diego A khriam u la thep ïa ka shi kol na bynta ka Sawmer SC ha ka minit ba 69 kaba la pynkmen bad ai mynsiem ïa ka kynhun kaba la nang tur sha ka kut jong ka Umphyrnai.
Kane ka shi kol kala nang pynrhem ruh ïa ka mynsiem ïakhun jong ka Umphyrnai kaba la ñion tyngeh sha ka kut jong ka Sawmer hynrei ka khlem lah pat ban thep kol.
Hynrei shwa ban kut ka jingïalehkai u Banraplang Nongsteng u la nang pynskhem shuh shuh ïa ka kynhun jonng ka Sawmer ban thep ïa ka kol kaba ar ha minit ba 90 kaba la pynlong ïa ka kynhun ban jop da 2-0 bad khur pura ïa ki lai point.
Ka jingïalehkai kan bteng biang ha ka 2 tarik Ïaïong 2022 ha kaba ka Lawsohtun SC kan aireng pyrshah ïa ka Smit SC ha ka por 3:30 baje janmiet.
