Shillong, Nailar, 18: U Myntri ka tnad Community & Rural Development (C&RD) u bah Hamletson Dohling u la ïathuh ha ka Sngi Thohdieng hapoh ka ïing dorbar thawaiñ ka jylla ba ka sorkar ka dang bishar bniah ïa ka jingdawa Block Ophis haduh 19 tylli.
Kine kiba dawa Block Ophis ki kynthup ïa ka Mawsaw (West Khasi Hills, Nartiang, Namdong (West Jaintia Hills ), Lumshnong, Wapung East Jaintia Hills bad kiwei kiwei. U la dawa ruh ban bishar ïa ka jingkyrpad u MLA ka Salmanpara u Winnerson D Sangma na ka bynta ban ai ïaka Purakhasia Block kaba hap mynta hapoh ka Block Dalu. Hynrei ha kajuh ka por u bah Dohling u la ïathuh ba kat haduh mynta pat um pat ïoh ïaka jingthoh na u MLA.
Na ka liang u MLA ka Nongpoh u bah Mayralborn Syiem ula dawa na ka bynta ban ai ïaka Umden Block kumjuh ruh u MLA ka Nongkrem u bah Lambor Malniang ruh u dawa ïaka Nongkrem Block. U Myntri u la kular ba yn sa bishar bniah ïa kine ruh. U la iathuh , kumba long mynta donkam kumba 12 klur ka pisa ban plie thymmai ïa kawei kawei ka C &RD Block.
