`1866 klur tyngka ki Eklavya schools project ban pynkylla ïa ka pule puthi ha ka jylla : CM

Shillong, Rymphang 25 : U Myntri Rangbah ka Jylla Conrad K Sangma ha ka Sngi Balang ula ong ba ka sorkar ka la theh pisa kaba bun bha sha ka tnad pule puthi, kynthup ka 1866 klur tyngka na ka bynta ki 38 tylli ki skul Eklavya Residential School bad ka jingkyntiew kyrdan ïa ki 2045 tylli ki skul hapoh ka Mission Education.
Haba jubab ïa ka jingïatai halor ka mang tyngka ha ïing Dorbar Thaw Aiñ, u Conrad ula ong “Ngi kmen ban pyntip sha phi ba lah dep ban kyntiew kyrdan ïa bun tylli ki skul ryngkat ka jingbei pisa ba 1866 klur tyngka ha ki 38 tylli ki Eklavya Residential Schools.”
Haba kren halor ka jingïaid ki kam ha ka pule puthi, u Conrad ula ong “Halor ka pule puthi, haba nujor bad kiwei ki Jylla ha ak thaiñ Shatei Lam Mihngi, ka jingdon paid jong ngi kat kum ka khana samari 2011 ka long 29 lak bad ka Tripura ka long 36 lak. Ka Meghalaya ka don 14,500 tylli ki skul katba ka Tripura ka don tang 4900 tylli ki skul”.
U Conrad ula pyntip ba ka Meghalaya ka don 55160 ngut ki Nonghikai bad 7783 tylli ki skul Sorkar, bad 4172 tylli ki skul ki ïoh ïa ki adhoc grant
“Ngi dei tang ma ngi na ki Jylla kiba ai grant in aid sha ki 4172 tylli ki skul, kaba pynmyntoi ïa ka kam pule puthi” ula ong.