Shillong, Naitung 13: Ha ka jingïalang bad ki DC bad SDO Civil mynta ka sngi ha Secretariat, u Myntri Rangbah, u Conrad Sangma, u la pynbna ba ka sorkar kan moramot noh ïa kumba 1800 tylli ki Skul LP jong ka sorkar.
U Conrad, u la ong ba ïa kane ka kam yn aiti ha ka tnad DRDA bad ki District Level Committee bad ki ophisar jong ka tnad ka pule dangle ban peit ban pynbha ïa ki skul kiba la jot la pei. Ka jingpyn bha kan kynthup ruh ka jingpynbiang ïa ki um, ka bor ding elektrik bad kiwei kiwei pat ki jingdonkam jong ki skul.
Kaba kum kane ka jingmoramot la leh ruh ha ki PHC, CHC bad ki Thanad Pulit. “Kiba kum kine ki kam moramot ki hap ïaid lyngba ki tnad treikam bapher bapher kaba la pynslem shibun ïa ka jingtreikam. Hynrei mynta yn weng noh ïa kane ka jingeh da kaba aiti beit ha ki bor kiba don ha ki District”, la ong u Myntri Rangbah.
Kane ka jingïalang kaba ka don lang ka Chief Secretary, Kong Rebecca Suchiang bad kiwei kiwei de ki ophisar ka la ïakren ruh halor ka jingpyntrei kam ïa ki skim pynroi ba la bei tyngka da ka sorkar jylla bad kumjuh ruh ka sorkar pdeng. Ka jingïalang ka la kham ïakren sani ha kaba ïadei bad ka jingwanrah ïa ki jingkylla ha ka rukom treikam, ban pynsuk bad pynsted ïa ki skim.
Shuh shuh ha kane ka jingïalang la ïakren ruh halor ka jingtreikam bad ka jingpynkhreh haba wan ki jinglynshop na ki bor ka mariang kumba ka la jia ha kine ki bnai kiba ladep. “Ka long kaba donkam ba borabor ngi dei ban long lypa kiba la pynkhreh ïa ki jingjia kiba kum kine”, la ong u Conrad.
Ha kane ka jingïalang la pylllait ne pyntreikam ruh ïa ka National Generic Document Registration System, nangta ka Chief Minister’s Social Assistance Scheme na ka bynta kiba don ka jinganna ha ki dkhot met, bad kiwei kiwei.
Ha ka jingïalang pat bad ki Pulit ha kaba la ïadonlang u DGP, u Dr Lajja Ram Bishnoi, DGP bad ki SP kaba la long ha Conference Hall jong ka Police Headquarter, u Myntri Rangbah, u la ïathuh ba 76 tylli ki thanad Pulit kin ïoh noh da ki kali thymmai na ka bynta ka jingtreikam ba khambha jong ki. “Ki tnad ym tang ba ki peit ïa ka shongsuk shongsaiñ, hynrei kidei ruh ka bor ba hakhmat eh ha kaba ïadei bad ka jingïaleh ban weng ïa ka jingeh ki paidbah”, la ong u Myntri Rangbah.
Nalorkata, u Conrad u la ong ruh ba ki thanad Pulit kin ïoh ïa ka jingpynbiang ha ki tiar treikam kum ki Computer, ki Cran bad ki Ambulance ha ki surok kiba bun ki kali ba ïaid bad kiba bun bha ki jingjia aksiden. Na ka bynta ka jingtehlakam ïa ka jingkhap ngiah bad sahkut kali, la rai ruh ban thied sa 60 tylli ki kali khamtam ha East Khasi Hills District.
Ha kane ka jingïalang la rai ruh ban don noh ka Chief Minister’s Police Medal bad ka Chief Minister’s Disaster Response Recognition Medal na ka bynta ki Pulit kiba treikam bha.
