Shillong, Jylliew 24: Ka United Democratic Party (UDP), kan jied ïa u President ba thymmai ha ka jingïalang kaba la buh ban pynlong ha ka 18 tarik u bnai ban wan.
Ha shuwa jong kane, u President ba mynta u Bah Bah Metbah Lyngdoh, un lum shuwa ïa ka jingïalang jong ki MLA ka Seng ban ïakren ïapynbeit ïa kane ka kam bad hadien kata yn sa shim ïa ka rai kaba khatduh.
Ïa kane la ïathuh da u Bah Lahkmen Rymbui, uba long uwei na ki nongïakam jong ka Seng bad u MLA bad Myntri ha kajuh ka por.
Ha kajuh ka por, u Bah Rymbui u la ïathuh ruh ba u Chairman jong ka Meghalaya Democratic Alliance (MDA) u Conrad Sangma, uba long ruh u Myntri Rangbah ruh un sa lum noh shen ïa ka jingïalang jong ka MDA. Hynrei u MLA ka Amlarem, u la ong ba um pat kwah eiei kaei kaban ïakren ha kane ka jingïalang jong ka MDA.
Halor kajuh ka por u la ong ba ha kaba ïadei bad ka jingjied ïa u President ba thymmai ka ri India, u Bah Rymbui u la ong ba ka rai jong ka BJP ban pynïeng da ka Longkmie riewlum, ka Droupadi Murmu, kadei ka rai kaba biang, namar mynshuwa ruh na Meghalaya la mih u Ba Bah GG Swell bad u PA Sangma, kiba long ki riewlum ban long kum i Kyrtong President, wat lada kim shym la jop ruh.
