Shillong, Nailar 9 : Wat la ka Block II ka don haduh 213 tylli ki shnong ha ka jingheh kaba 384 Square Miles hynrei ka Synjuk Ki Rangbah Shnong Border Area Raid Nongtung ka la pynpaw ba ka kwah tang 18 tylli ki shnong Khasi ki ban wan phai na ka Assam sha Meghalaya khnang ba kin im suk im saiñ.
ïa kane la pynpaw ha ka dorkhas ba la ai da ka Synjuk sha u Myntri Rangbah ka jylla mynta ka sngi kaba la soi da u Chairman bah B.Sohtun ha ka jingïalang kaba la long ha Secretariat, Shillong.
Kine ki shnong kiba ka Synjuk ka kwah ban wan phai sha Meghalaya kiba hap hapoh ka Raid Nongtung jongka Hima Khyrim kiba don 18 tylli ha Block II , Ri Bhoi District ki dei ka Sabuda, Jatalong, Madan Umwang, Khlieh Umwang, Umlaper, Laru, Umtlieh, Ummat, Umru, Umshadktad, Pdengtliej, Umhi, Itpatung, Umsder, Umtyrshing, Umsaw Lumdorbar, Mawsladieng bad Imsohlaper.
La ïathuh ha katei ka dorkhas ba ka jingdon ki paid Khasi ha kine ki 18 tylli ki shnong ki long kumba 9000 ngut bad kine ki dei ki trai shnong naduh hyndai hynthai hynrei ki don pat kumba 5000 ki Nepali kiba wan buhai shnong beaiñ ha kine ki jaka bad kine ki dei kiba dang shu wan shen na Nepal ne Darjeeling.
Ki don haduh 5000 ngut ki nongthep vote kiba hap hapoh ka Mawhati Assembly Constituency bad ki dang don bun ki ban dang pynrung kyrteng ruh.
“ Ngi ki Khasi kiba im ha kine ki 18 tylli ki shnong ngi khlem dawa ïa kaba long pyrshah ïaka Riti Synshar ka Ri India hynrei ngi kyrpad ïa ka sorkar pdeng, sorkar Asssam bad sorkar Meghalaya ban pynbeit ïa kane ka kam da ka jingïasngew thuh jingmut bad shah ba ngin hap hapoh u pud u sam ka Meghalaya namar ka rukom im bad ki riti dustur jong ngi ki long beit ki Khasi paka”, pynpaw ka Synjuk ha ka dorkhas sha u Myntri Rangbah.
“ Ngi kyrpad ruh ïa ka sorkar Assam ba kan long sbun mynsiem bad sngap ïa ngi namar ngim shym dawa baroh kawei ka Block II hynrei tang ïa kine ki 18 tylli ki shnong Khasi bad sngewbha shah ba ngin hap hapoh u pud u sam ka Meghalaya” pynkut ka dorkhas.
“Ngi la buh ka jingkyrpad ba ka sorkar ka dei ban ïakhun ban ïoh biang ïa kine ki 18 tylli ki shnong jong ka Raid Nontung jong ka Hima Khyrim kiba la shah pynhap jubor sha ka Assam namar ngi kum ki nongshong shnong ngi kwah ban don sha ka jylla Meghalaya” ong u Bah Blikstar Sohtun Chairman synjuk haba kren bad ki lad pathai khubor.
U la ïathuh ruh ba namar kine ki 18 tylli ki shnong ki dei ki bynta jong ka Raid Nongtung naduh ki bun spah snem kiba la leit ha kaba ki mawniam, mawbah ki dang ïeng haduh kine ki sngi ba mynta ban sakhi ïa ka jinglong trai jong ka raid ïa kine ki jaka.
Haba la kylli pat ïa ka daw kaba ki kwah ban wan sha ka Meghalaya u Bah Blister u la ong “Ngi dei ki Khasi kiba bud ïa ka rukom bad ki riti dustur kiba pher bak-ly-bak na ki Assam wat ha ka ktien ka thylliej ruh ngim ïadei, dei na kata ka daw ngi kwah ban don beit bad ka jylla Meghalaya.”
“Ngi la buh ka jingkyrpad ba ka sorkar kan buh ki ktem pulit ha khappud khnang ba kan ai jingshngaiñ ïa ngi kiba shong ba sah ha kane ka jaka” ïathuh u bah Blikstar. Shuh shuh u la ïathuh ba na ka liang u Myntri Rangbah u la kular ba na ka sorkar hi kan leh la ka bynta ban weng ïa ka jingeh jong ki nongshong shnong jong kane ka thaiñ.
