Shillong, Ïaïong 15: Da ki spah ngut ki nongïalehkai table tennis pawnam jong ka ri India kin wan ban ïashim bynta ha ka Senior National Table Tennis Championship kaba 83 kaban sdang naduh ka 18 tarik Ïaïong hangne ha Nongbah Shillong.
Ïa kane ka lympung yn pynlong ha Indoor Training Centre jong ka Sports Authority of India (SAI) kaba don ha North-Eastern Hill University (NEHU), haz kaba ki nongïalehkai Table Tennis kynsai ka ri India ba kynthup ïa ka Manika Batra, Sathiyan Gnanasekaran, Sutirtha Mukherjee bad Achanta Sharath Kamal kin wan ban ïashim bynta. Katba ka Meghalaya kan phah ïa ka kynhun ba 14 ngut ba kynthup ïa ka thei khur takma Ksiar na bynta ka jylla NorthEast ha ka Olympics 2018 ka Tanushree Das Gupta.
Ka Meghalaya Table Tennis Association (MTTA) kala ïoh ban ïakynduh ïa ki nongthoh khubor ka jylla ha ka sngi Palei kum shi bynta ban pynbna halor ka jingpynkhreh ïa katei ka lympung knieh lahduh.
Na ka liang u Vice-President jong ka MTTA ha kajuh ka por u Chairman jong ka Organising Committee, u Bruce P Marak u la ïathuh ba kane kadei kawei na ki lympung kaba heh tam ba ka Meghalaya ka ïoh ban pynlong.
La khmih lynti ba ha kane ka lympung kin don kumba 450 ngut ki nongïalehkai table tennis kynthuo ïa 200 ngut ki coach, nangta ki nongkitkam jong ka Table Tennis Federation of India bad kiwei kiwei kin wan sha Nongbah Shillong ban ïashim bynta ha kane ka lympung. Ïa ki player ban ïalehkai na bynta ka ri yn jied katkum ka jinglah jong ki ban ïalehkai bha ha kane ka lympung.
“Ha ka jingshisha ïa kane ka championship la dei ban pynlong ha u Kyllalyngkot, hynrei na ka daw ka jingshah pynthut ha ka sien kaba lai jong ka khlam jingpang Covid-19, la pynkynriah noh ha u Ïaïong,” ong u Marak.
“Ïa ki jaka sah, ki nongpahara bad jaka ïalehkai la dep ban pynkhreh nadong shadong bad ka sorkar jylla kala ai ka jingkyrshan kaba pura ïa ngi ban pynlong ïa kane ka tournament.”
Ka sorkar jylla kala wanrah ïa kane ka tournament hapoh ka jylla kum shi bynta ka jingrakhe dap 50 snem ka jingïoh la ka jong ka jylla kaba pura. Ha kaba ïadei bad kane ka championship, saw ngut ki nongïalehkai ba pawnam jong ka ri kin leit ruh sha Tura na bynta ban pyni ïa ka jingïalehkai kumba la ai jngmut da u Myntri Rangbah jong ka jylla u Conrad K Sangma, uba dei ruh u nongkyrshan ïa kane ka lympung.
Kum ban pynkynmaw hangne ba ka nongbah Shillong kala ïoh ruh ban pynlong ïa ka jingïalehkai table tennis, kum ka South Asian Games ha u 2016 bad South Asian Federation Junior Table Tennis Championship ha u 2012. Baroh kitei ki lympung la pynlong ha JN Indoor Stadium, Polo.
Ki player kum ka Batra bad u Sathiyan kin wan ban ïalehkai bha ha Shillong hadien ba kila ïoh ban ïashim bynta ha ka SAG 2016.
