Shillong, Nailur 06: Naduh ba ki Pulit ka jylla ki la pyntreikam pyrkhing ïa ka jingtah ïong ïa ki ïit kali, ha kine ki lai bnai baladep, kata naduh ka 1 tarik u Naitung haduh ka 6 tarik u Nailur 2024, la don haduh 1788 tylli ki kali kiba la ïoh bat shah tar noh film rong ïong kiba la tah ha ki kali jong ki, kata tang ha East Khasi Hills District.
Ka Kyrwoh ba la phah da u SP ka East Khasi Hills, u Bah Sylvester Nongtnger, la ong ba nalor ba la tar noh ïa ki film ïong na ki kali la shaiñ kuna ruh ha kajuh ka por bad ka kuna ba la ïoh lum ha kine ki lai bna ka long 13,500, 00 tyngka.
U SP ula ong ba kane ka jingpyntreikam ban tar ïa kiba tah ïit ïong ka long katkum ka jingbthah jong ka Supreme Court ka ri India naduh u snem 2011. Ha kajuh ka por u kyntu ïa ki paidbah ban kiar na kaba tah film ïong ha ki kali ban lait na ka jingshah bat ha ki Pulit bad khamtam eh ban lait na ka jinglut ksan ka bai film bad ka bai shaiñ kuna..
