Shillong, Jylliew 19 : Ka Jylla ka la ïoh ban khur haduh 17 tylli ki takma na ka lympung ïalehkai jong ka India Open International Karate Championship 2023 kaba long ha Talkotara Indoor Stadium, New Delhi ha ka 17 bad 18 tarik mynta u bnai.
Ha kane ka kynti ka All Meghalaya Karate – Do Association kala phah haduh 31 ngut ki nongïalehkai hapoh ka jingïalam jong u Bah Donboklang Lyngdoh, Arjuna Sewa, Pynhunlang Kharbuli bad u Sunil Rathee kum ki coach bad manager.
Katei ka kynhun ka la khur ïa ka kyrdan ba lai ha katei ka lympung da kaba khur 5 tylli ki takma ksiar, bad mar 6 tylli ki takma rupa bad takma rnong.
Kumta halor kane ka jingjop, na ka liang ka Synjuk ka ai ka jingkitbok ïa baroh kiba khur takma kynthup ïa ki nongïalehkai, ki coach bad ki manager.
Ki nongïalehkai ba khur takma ksiar ha katei ka lympung ki kynthup ïa ka Daphishisha Shadap, Larisha Kurbah, Daphilahun Wahlang, Damebanmerbha S Blah bad Saralin Rynghang.
Nangta kiba khur takma rupa pat ki long ka Inlumlang Skhemiew, Rebeka Nongspung, Bhawan chwadame L Mawphlang, Davyson Kharkongor (khur ruh ïa ka takma rnong), Kmenlang Shabong bad u Nangkitbok Phira.
Ki nongïalehkai kiba khur takma rnong pat ki kynthup ïa ka Durka Padit, Carene Sohiong, Garry Daniel L. Mawlong, Anysha Wahlang bad Paul Danny Kharmudai.
