Shillong, Lber, 25: Ka kashari jong ka Swapna G. Momin, kaba dei ka Special Judge (POCSO), East Khasi Hills lyngba ka rai ba la pynmih ha ka 11 tarik mynta u bnai ka la rai pynrem ïa u Kluston Ryntathiang da kaba set along 17 snem hadien ba la lap ba u donkti ha ka kam leh be-ijot.
U kyrwoh ba la phah da u Superintendent of Police ka East Khasi Hills Bah Vivek Syiem ula pyntip ba ïa ka case la register ha Laban Police Station ha u snem 2015 hapoh ka Section 6 POCSO Act pule lang bad ka Section 506 Indian Penal Code.
Ka Kashari ka la hukum ïa u nongleh kam bymman ban ai jingpynshitom hapoh ka Section 6 POCSO Act da kaba shong along 14 snem bad daiñ kuna kaba T.10,000 hajar bad lada ym lah ban siew ïa ka kuna un hap ban bteng biang ban shong along sa ar bnai.
Ha ka jingai jingpynshitom hapoh ka Section 506 IPC ka kashari ka la hukum ban set along 3 snem bad ban daiñ kuna T. 5,000 hajar bad lada ym lah ban siew ïa ka kuna un hap ban shong along sa shi bnai kynthih.
Ïa ka jingtohkit la bynshet ha ka Inspector Phrianglin Syiem jong ka District Executive Force (DEF) kaba la trei pat mynta ha Reserve Inspector, Police Reserve, Shillong.
