Shillong, Nailur 19 : Ka sorkar jylla kam pat ai ktien satia sha ki hajar ngut ki samla kiba dang ap sah mynta ïa ka result kam pulit kaba ki la dep thoh la bun bun bnai mynta.
Haba kren bad ki lad pathai khubor, kitei ki samla kiba pynlong da ka jingshong kyllain myngor ha khmat ka ophis Meghalaya Board of School Education (MBoSE) ki la ïathuh ba ïa ka admit card ki la ïoh naduh u snem 2019 bad dei ha u snem 2021 ba ki la pyndep ïa ka mareh bad katba ïa ka written test pat ki pyndep ha u bnai Rymphang mynta u snem.
“Ngi la nang khmih lynti ba tang hapoh khyndiat bnai ka sorkar kan pynmih noh ïa ka result pynban man ka por ba ngi peit ha ka website jong ka Meghalaya Police ka paw beit da kaba rim,” ong kitei ki samla.
Ki la ïathuh ruh ba ha katei ka jingpynlong jongki ïa ka jingshong kyllain myngor kadei ban pynkynmaw ïa ki bor sorkar ba kin pyllait noh ïa katei ka result khnang ba kin suk ka mynsiem la ki mih ne jah kyrteng ruh.
“Ngi la pynlut ka por bad ka bor kumjuh ka pisa ban wan ïakhun ïa kitei ki eksam hynrei lada ka result wat haduh mynta kam mih ka pyndiaw mynsiem bad pynduh jingkyrmen ïangi,” ong kitei ki samla.