SHILLONG, Nailar 14: Ka lympung ïalehkai Judo kaba la tip da ka ASMITA Judo League jong ka East Zone kan sa sdang shen naduh ka 16 tarik haduh 19 tarik Nailar, 2024 ban pynlong ha SAI, Indoor Stadium-NEHU, Shillong.
La khmihlynti ba ha kane ka lympung kaba saw sngi lynter kin don kumba 70 ngut ki kynthei ïalehkai Judo ki ban ïashimbynta ha ki kyrdan bapher bapher ba kynthup ïa ka: Senior, Junior, Cadet bad ka Sub-Junior.
Ryngkat ki kyrdan katkum ka jingkhia jong ki nongïashimbynta, la khmihlynti ba kane ka League kan long kaba kham pher bad kaba itynnat. Ka song tyngka ba la pynkhreh ka long 4.26 Lak, bad ka jinglut jingsep ka lah ban kot ïa ka 11.70 Lak, kaba pyni ïa ka jingangnud jong ka synjuk ban kyntiew ïa kane ka jingïalehkai.
Kane ka lympung ka thmu ban ithuh bad pynroi ïa ka sap jong ki samla da kaba wanrah bad pynbiang ïa ki rynsan ïakhun na bynta ki nongïalehkai judo kiba kynsai ban sei madan ïa ka sap kaba maki ki don.
Ka nongbah Shillong, kaba la bna nam ha ka jingriew spah ka mariang bad kolshor, kan sa ïoh ïa ka kabu ban kyntiew bad pynpaw nam ïa kane ka jingïalehkai ha kaba kan sa ïoh ban pynlong mynta u snem.
Katba ki nongïalehkai na kylleng ka thaiñ kin wan ban ïashimbyntalang ha kane ka nongbah, la khmihlynti ba yn sakhi ïa ka jingïalehkai kaba itynnat bad ban shem ïa ki sap ba kyrpang, bad ruh ka jingïatylli ki nongïashimbynta lyngba ki lympung ïalehkai.
Ka ASMITA Judo League East Zone ka dei ka lympung kaba la pynkhreh ban pynpaw nam ïa ka judo, ban pynshlur ïa ki khynnah ba dang khie san bad ruh ban pynroi ïa kane ka jingïalehkai ha kane ka thaiñ.
