`16 lak ai jingïarap u ma Sniawbhalang ha shnong Mynsngat ban pynbha ïa ki skul bad ka ïingdorbar

Jowai, K’lyngkot 31: U ma Sniawbhalang Dhar uba dei u MLA ka 1-Nartiang Constituency mynta ka sngi 31 tarik u Kyllalyngkot 2026 ula bteng ban ai jingïarap sha ki paidbah na ka bynta ki kam pynroi, da kaba aiti haduh 16 lak tyngka haka shnong Mynsngat West Jaiñtia Hills District da ka jingmut ban pynkhlaiñ ïa ka pule puthi bad ban pynbha ïa ki jingtei ba bun.
Lyngba kane ka jingïarap pisa yn sdang pynbha ïa ka ïing skul ka St. Joseph Secondary School ha Mynsngat, khnang ban biang ka pule puthi ki khynnah skul bad ban pynthikna ïaka jingïada bad ka jingshngaiñ ki kamra klas, kane ka dei ka jingthrang kaba hakhmat eh jong u MLA na ka bynta ki khynnah skul bad kiwei de ki kam pynroi hapoh ka shnong.
Shuh shuh u ma Sniawbhalang Dhar ula ong ka jingtei ïa ka Community Hall ha Dong Mainroad jong ka Shnong Mynsngat ka long kaba donkam eh, na ka bynta ban pynlong ïa ki jingïalang paidbah bad ki prokram bapher bapher.
Nalor kata ula mynjur ruh ïa ka jingpynbha sa ka ïing skul ha Nongsutnga Mynsngat, shi bynta ban pynkhlaiñ shuh shuh ïa ka pule puthi kaba long ka lad jingïarap ïa ki khynnah skul bad kumjuh ïa ki nonghikai.
Na ka bynta baroh kitei ki jingdonkam kala kot sha ka ?16 lak tyngka,ïa kaba u MLA ula ai jingïarap hadien ka jingpynsngew jong kitei ki skul bad ka jingdonkam ka shnong hapoh ka Constituency jong u.
Na ka liang ki Dkhot jong ka shnong Mynsngat kila ai ka jingïaroh bad ka jingkhublei ïa u MLA ka thaiñ namar ka jingpynleit jingmut nyngkong jong u haka pule puthi bad ka bha ka miat jong ka shnong hi baroh kawei.