156 tylli ki kali Private shim wai ka tnat Pulit, 10 klur tam ym pat siew pisa, lap ka RTI

Shillong, Risaw, 11: Ka tnat Pulit ka la pynshah pisa haduh 10.54 klur tam sha ki trai kali kiba aiwai ïa ki kali na ka bynta ban pyndonkam ha ki kam jam jong ki ophis treikam ha ka tnat Pulit.
Kane ka long katkum ka jubab RTI ba la ïoh pdiang da u Bah Disparsing Rani na ki ophis treikam jong ki Superintendent of Police jong ki 10 tylli ki district ka Jylla Meghalaya
“Ïa ka jubab RTI nga la ïoh pdiang tang na ki shiphew tylli ki distrik katba ki bym pat ai jubab ki long ka Nongstoin bad Baghmara,” la ïathuh u Bah Disparsing Rani ha ka jingïakren bad ki lad pathai khubor ha ka sngi Thohdieng.
“Katkum ka jubab RTI ba nga la ïoh pdiang, ha East Khasi Hills ki kali ba la shim wai na ki riewspaidbah ki long 74 tylli, ki kali ML 02 ki don 270 tylli bad ka pisa kaba hap ban siew sha ki trai kali ka long 5,93, 80,584 klur. Ha South West Khasi Hills la shim wai 6 tylli ki kali, ki kali ML02 ki don 37 tylli bad ka pisa kaba hap ban siew sha ki trai kali ka long T. 21,05, 602 lak. Ha Eastern West Khasi Hills ki don 3 tylli ki kali la shim wai bad ki kali ML02 ki don 11 tylli bad ka pisa ba hap ban siew sha ki trai kali ka long T. 7,93,427 lak” la ïathuh u Bah Rani katkum ka jubab RTI.
U la ïathuh ba ka tnat Pulit ha West Jaiñtia Hills, ka la jubab ba ym lah ban ai jingtip ïa ka jingshimwai ïa ki kali paidbah bad la pyntip ruh ba ym lah ban ai jingkheiñ ïa ka jingdon jong ki kali ML02 hynrei la shu ai tang ïa ka jingtip tang ïa ka pisa kaba hap ban siew sha ki trai kali kaba kot T. 67,57, 449 lak. Ha East Jaiñtia Hills ka tnat Pulit ka la aidaw ba ym lah ai jubab ïa ki kali ba la shim wai katkum ka Section (g) jong ka RTI Act 200 hynrei la jubab tang ïa ka jingdon 45 tylli tylli ki kali ML02 bad ka pisa ba dang sah ban siew sha ki trai ba aiwai kali ka long T. 8,91,345 lak. Ha Ri bhoi ruh, ka tnat Pulit ka la jubab ba ym lah ban ai jingtip halor ka jingshim wai ïa ki kali paidbah, ïa ka jingdon jong ki kali ML02 bad ïa ka pisa ba dang sah ban siew sha ki trai kali.
Haba kynthoh halor ka kyntait ban ai jubab katkum ka hok wad jingtip ïa ka tnat Pulit u Bah Rani u la ong, “lada ïa ka jingshim wai ïa ki kali paidbah ruh ym lah ban ai, ka jingdon jong ki kali ML02 ruh ym lah ban ai bad wat ïa ka pisa kaba dei ban siew sha ki nongai wai ruh ym lah ban ai. Ka mut ka dei ka pisa jongno kata?”
Shuh shuh u la pynpaw ba katkum ka jubab RTI ba la ïoh pdiang na ka tnat Pulit jong ka South West Garo Hills la pyntip ba ki kali ba la shim wai na ki riew paidbah ki long 13 tylli, ka jingdon jong ki kali ML02 ka long 32 tylli bad ka pisa ba hap ban siew sha ki trai kali ka long T. 32 lak. Ha West Garo Hills ka jingshim wai ïa ki kali paidbah ka long 35 tylli, ki kali ML02 ki don 82 bad ka pisa kaba hap siew sha ki trai kali ka long T. 1,58,48,170 klur. Ha North Garo Hills la shim wai 15 tylli ki kali, ki kali ML02 ki don 54 tylli bad ka pisa kaba hap siew sha ki trai kali ka long T. 98,66,266 lak. Ha East Garo Hills District la shim wai 10 tylli ki kali, ki kali ML02 ki don 60 tylli bad kaba pisa ba hap siew sha ki trai kali ka long T. 57, 35,250 lak.
“Haba kheiñ lang baroh ki kali paidbah ba ka tnat Pulit ka la shim wai ki don 156 tylli. Ki kali ML02 ki don 593 tylli bad ka pisa ba ka tnat Pulit ka hap siew sha ki trai kali ka long T. 10,45,78,093 klur,” la ïathuh u Bah Rani.
U Bah Rani u la ong ruh ba katkum ka Section 66 jong ka Motor Vehicle Act 1988 ka kdew shai ba ym lah ban shim wai ïa ki kali ba khlem register kum ki Comercial Vehicle ne kum ki kali kamai hynrei tang ki kali ba la register kum ki kali kamai ki tnat treikam ka Sorkar ki lah ban shim wai.
“Ka la don ruh ka kaiphod jong ka Central Vigilance Commission ha u 2016 ha kaba la lap ba ka jingshim wai ïa ki kali ka long tang na kito don jingïadei bad ki ophisar ne ki briew kiba don jingïadei bad ka Sorkar. Kata ka kaiphod ka la leit ruh sha ka Finance Commission halor kane ka jingleh ki tnat treikam,” la ong u Bah Rani.
U la ong ruh ba katkum ka Section 66 jong ka Motor Vehicle Act 1988 ka long kaba be-aiñ ban shim wai ïa ki kali shimet jong ki riewpaidbah.
“Ka jingkylli kaba mih mynta ka long hato ka jingshna ïa ka Meghalaya Vehicle Act bad Rule mynta u snem kin (Sorkar) pynrung neem ïa ka Section 66 lada kim pynrung kan don ka jyrsieh bamsap kaba shyrkhei bha ha kane ka jylla Meghalaya namarba ki don ki kali ba la shim wai da ki Corporation bad ki tnat treikam ka Sorkar ki dei hi ki kali jong ki riewshimet,” la kynthoh u Bah Rani.
“Kane ka long kaba be-aiñ bad ka bym shong nongrim. Ka kaiphod jong ka Central Vigilance Commission ka lap ba ka don ka jingleh buittuh namarba kito kiba don jingïadei ki ïoh Bill bad ki bym don jingïadei kim ïoh Bill. Nga la ïoh ujor ruh na ki padibah ba ki la hap ban shim noh ïa ki kali ba la aiwai sha ki tnat treikam ka Sorkar tang na ka daw ba kim ïoh ïa ka Bill,” la bynrap u Bah Rani.
U la pyntip ruh ba un sa leit ujor sha u Chief Vigilance Commissioner uba dei u Chief Secretary jong ka Jylla halor ka jubab RTI ba u la ïoh pdiang.
“Ka RTI ka dei ka stieh ïa ka tnat treikam jong ka Sorkar ha kaba ki dei ban bud katkum ki kyndon aiñ bad kim dei ban leh khlem da ka khot ïa ka tender. Kiba don jingïadei bad ka Sorkar ne bad ki ophisar kim ïaid katkum ka Tender. Nga kyntu ba ki dei ban ïaid katkum ki kyndon jong ka aiñ bad kim dei ban ïaid beaiñ,” ong shuh shuh u Bah Rani.
U Bah Rani u la pyntp ruh ba u la pan RTI halor ka jingtah iit iong jong ki kali namarba katkum ka Motor Vehicle Act ka kdew shai ba kito kiba shah daiñ kuna ha ka sien banyngkong eh ka dei ban long tang T. 100.
“Hynrei ha kane ka jylla jong ngi la daiñ kuna T. 1000 bad T. 2000 hajar,” bynrap u Bah Rani.