Nongpoh, Nailur 4: Hadien ka jingmih ki khubor haki lad pathai bapher bapher kaba la pynpaw halor u bah Sumarlang Swer ba dei u President youth wing jong ka UDP Ribhoi District uba la leit ban pynïasoh pat sha ka HSPDP hynnin ka sngi
Ki nongïalam ka UDP Ri Bhoi naduh u bah Donbok Khymdeit kum u President ka UDP Ribhoi lem bad u bah Micheal Kharhunai Secretary ka UDP Ri Bhoi ryngkat bad ki Dkhot ki la ai ka jingpynshai paidbah ba katei ka jingmih jong katei ka khubor ka long kaba bakla bad ialam bakla iaki paidbah.
U bah Khymdeit u la ong ruh, ba u Sumarlang Swer ha shwa ba un leit ban pynïasoh sha katei ka party HSPDP u la dep ban resign shwa naka seng UDP kum u President Youth Wing jong ka UDP, bad ka seng UDP ka la ioh ban pdiang ïaka shithi iehnoh kam na u bah Sumarlang Swer naduh ka 17 tarik Rymphang jong u snem 2022, kaba mut u bah sumar um dei shuh u Dkhot jong ka UDP naduh utei u bnai, ong u bah Khymdeit.
Shuh shuh u la ong ba Kane ka jingai jingpynshai halor Kane kaphang ka long ba kan nym ïalam bakla ia kiwei pat lyngba katei ka khubor.