15 tarik yn rai ka Mawlai bad ka Shillong Lajong mano ban rah ïa ka nam lahduh

Shillong, Lber 10: Ka rai mano ban rah ïa ka nam lahduh jong ka Shillong Premier League 2024 kan long ha ka jingïalehkai ba khatduh jong ka samoi hadien ba ka Laitkor SC ka wanrah biang ïa kawei pat ka jingïalehkai kaba itynnad ban khanglad ïa ka Mawlai SC, ha kaba ka jingïakhun ka la kut ha ka jingïakhaid da 2-2 kol ha madan First Ground – SSA Stadium, Polo, ha ka sngi Nyngkong.
Ha kane ka jingïakhun, ka Laitkor ka la pynkordit ïa ka Mawlai namar ba ka la hap ban ïakhun shitom ban pynïakhaid ar sien ïa ka kol. Ka Laitkor ka la ïoh ban pynkhihjar lyngba ka kol ba la kum thep hi (22’) bad nangta lyngba u Sandy Kharkongor (35’), katba u Kevin Rymbai (27’) bad u Banskhemlang Mawlong (58’) ki la thep na bynta ka Mawlai.
Ka jingjop ïa ka Mawlai kan jin da la pynthikna ïa ka ban long ka lahduh da kaba sah sa tang kawei ka jingïalehkai hynrei ka jingïakhaid ka mut ba kan dang donkam ban kiar na ka nam rem ha ka Shillong Lajong FC kaba wan ha ka kyrdan ba-ar, ha ka jingïalehkai ba khatduh jong ka samoi, kata la sngi Saitjaiñ.
Lah ban kdew hangne, ka Lajong kaba la kamai 42 poiñ, kan donkam ban pynliem ïa ka Mawlai (45) ban rah ïa ka burom ha ka sien kaba san, katba ka Mawlai ka donkam tang ïa ka jingïakhaid ban rah lai sien lynter ïa ka nam lahduh.
Watla ka ïakhun shitom ban khur ïa ka jingjop ban pynkut ïa ka samoi ha ka kyrdan ba saw, hynrei da kaba ïakhaid ka Laitkor ka la kiew shi kyrdan sha ka kyrdan ba san ha ka miej. Kane ka kynhun ka la pynkut ïa ka samoi ïalehkai jong ka da kaba kamai 25 poiñ hadien ba ka la jop hynñiew sien, ïakhaid saw sien bad shah rem hynñiew sien.
Ka kol kaba nyngkong ka dei hi la ka bok jong ka Laitkor, ha kaba ka bol pashat ba la wan na u Moonstar Nongsiej ka la tyngkhuh shuwa ïa ka khlieh jong u Brolington Warlarpih rangïalehkai ba shadien jong ka Mawlai bad ka la rung beit beit shapoh kol.
Ka Laitkor ka la ïoh ïa ka jingkyrshan kaba radbah na ki nongkyrshan kiba la ai mynsiem ïa la ki jong ki rangïalehkai. Hadien katto katne por ki la shah pynsngap jar, hadien ba u Kevin u la pynkhih ïa ka kol na bynta ka Mawlai ban pynïakhaid.
Hynrei ka jingpyrshang jong u Sandy ha ka 34 minit ka la rung jlang sha kol ban buh biang ïa ka Laitkor ha ka jingkyrmen, bad ban lamkhmat ïa ka kylla step da 2-1 kol.
Ka Mawlai kam pat ju rem baroh shi lynter ki jingïalehkai mynta ka samoi bad kam pat ju mlien ban sahdien lane ban shah lamkhmat. Ha ka jingshisha, dei tang shi sien ba ka la shah thep ar ha ki jingïalehkai – kata ha ka jingïakhun ba nyngkong jong ki pyrshah ïa ka Rangdajied United FC, kaba ki la jop.
Ka Mawlai ka la ïoh ïa ka kol pynïakhaid kaba ar jong ka tang hadien katto katne por ba la ïaid ka kylla miet, da ka jingïai pynbor jong ka ban tur shakhmat kaba la buh ïa ki rangapdien jong ka Laitkor ha ka jingeh kaba khraw. Hadien ka jingpyrshang thawlad kaba bun sien, ka bol ka la wanpoi sha u Batskhemlang, uba la ïaid lait ïa ki lai ngut ki nongïalehkai pyrshah shuwa ban thep ïa ka sha kol.
Ka Laitkor kam shym la hun ban shu ïakhaid bad ka la ïai bteng ban ïakhun ban ïoh ïa ka jingjop hynrei ki kabu kiba bha tam hadien kane baroh ki la wan ha ka lynti jong ka Mawlai. U Honestar u la hap ban ïada ïa ar tylli ki jingma ban khanglad ïa ka jingpyrshang thep kol jong u Kevin bad u Damanbhalang.
Kam dei satia ka resol ba ka Laitkor ka kwah hynrei ki la lah ban ïalehkai bha watla kadei ka samoi ba nyngkong ïa ka ha ka OC Blue SPL bad ki la pyndep ruh kham ha khmat ban ïa kiwei pat ki kynhun ba la rim. Ka Lajong ruh kan sngewnguh shikatdei eh ïa ki namar ka jingïakhaid ka la plielad biang sa shi sien ïa ki ban ïaknieh ïa ka nam lahduh, ha kaba ka jingïakhun ha ka sngi Saitjaiñ pyrshah ïa ka Mawlai kan dei ka jingïalehkai ban rai ïa ka lahduh jong ka lympung.
Ha shwa kane kan don sa kawei pat ka jingïalehkai bad kan long mynta ka sngi hapdeng ka Nongthymmai SC pyrshah ïa ka Rangdajied United FC ha ka por 3 baje nohphai sngi. Kine ki arliang mamla ki ladep pynthikna ba kin pynkut ha ka kyrdan kaba khyndai bad ba lai, marïabud, kumta kane kan dei ka lad ban pynkut ïa ka samoi da ka jingjop, namar ba baroh arliang mamla ki la shah rem ha ki jingïalehkai ba dang shen.