15.4 metrict tonne wan poi ïa u Sohtrun ha ka tamasa balai sngi ha Delhi, lut tang hapoh 3 baje

Delhi, Nailar, 03: Haduh 15.4 metric tonne u Sohtrun na ka jylla Meghalaya la wanrah ha ka tamasa pynïaid ïew ha Dilli Hatt INA, New Delhi, kaba la sdang naduh ka sngi Thohdieng bad ïa kaba la pynkut ha ka sngi u Blei.
U Director ka Food Processing jong ka Sorkar Jylla u Bah M.D Shadap ha ka jingkren bad ki lad pathai khubor ha ka sngi pynkut ïa kane ka tamasa, u la pynsngew ba ka jingdawa ïa u Sohtrun napoh ka jylla Meghalaya ka la long kaba jur bha ha kine ki lai sngi lynter ha kane ka tamasa.
U la ong ka jingdawa ïa u Sohtrun ha kane ka kynti ka la poi sha ka 15 ton tam bad tang hapoh 3:00 baje noh sngi u Sohtrun uba wanrah sha kane ka tamasa ula lut na ka daw ka jingwan thied jong ki paidbah na kylleng ki jaka jong ka nongbah Delhi bad kiba nabar ruh kumjuh.
Namar ka jur shaba palat ka jingdawa ïa u Sohtrun ki paidbha kiba kwah ki lah ban thied Online na ki kompani kiba ladep ban ïasoi bad ka Sorkar ha ka sngi ba la sdang ïa ka tamasa, ong u Bah Shadap.
Kumba long mynta, u ong ba ka jylla Meghalaya ka don ïa ka jaka rep haduh 12 hajar hectare bad ka jingpynmih ïa u Sohtrun ka long haduh 1. 50 lak ton ha ka shisnem, katba ïa ki nongrep kiba la pynpoi sha kane ka jaka ki dei na ki ar tylli ki jaka kiba pynmih bun eh ïa une u jait soh, kata, na Ri-Bhoi bad na West Garo Hills.
“Hapoh kine ki lai sngi, ngi la pyrshang ban kham pynduna ïa ka rukom die ïa u Sohtrun namar ka jingdawa shaba palat na ki paidbah na ka daw ba u soh u shngiam bad u thiang.. Ka jingshngiam bad ka jingthiang jong u Sohtrun kaba la khring ïa kiba bun ki paidbah, khamtam ha kum kane ka por ba ka jinglong jingman jong ka suiñ bneng ha nongbah Delhi ka kham shit bha,” u la ong.
La pynshong shit shuh shuh ha kane ka tamasa da ki kynhun rwai bapaw na ka jylla kiba kynthup ïa ka The Lynx, Skubo Project, Elena Sohktung & the Band bad ka Hegim Durama.