Shillong, Nailur, 07: Ka Kynhun Myntri ka Jylla ha ka sngi Balang ka la ïathir ïatai ïa ka aiñ-rew ba la tip kum ka Meghalaya Ropeway Bill, 2022 shwa ban rah ïatai ha ka Ingdorbar Thawaiñ ka Jylla ka ban sa long shen na ka bynta ban pyntreikam noh shen ha kane ka jylla Meghalaya.
U Myntri Rangbah ka Jylla u Conrad Kongkal Sangma ha ka jingïakren badki lad pathai khubor u la ong, “ka jingïatai halor kane ka Bill ka long ban plie lad na ka bynta ban pyntreikam ïa ka Rope Way kaba kit beit thik tang na ka bynta ki nongjngohkai pyrthei.”
“Ïa ka Shillong Peak Ropeway ba nyngkong eh kaba kot malu mala kumba T.140 klur yn bei pisa lyngba ka New Development Bank (NDB) bad ngi khmihlynti ba yn sa khot tender noh shen halor kane ka Rope Way hapoh 15-30 sngi eiei,” la ong u Myntri Rangbah.
U la ong ruh ba kane ka Bill kan plie lad kumno ban pyntreikam ïa ka Rope Way bad kiei de ki kyndon bapher bapher ïa kiba dei ban bud ha kaba buh ïa ka Rope Way.
“Ki kyndon ki long ïa ki kynhun ba pynïaid ki dei ban don ïa ka Laisen, bad ka jingbit bad ban pynthikna ïa ka jingshngaiñ bad ki lad jingïada. Baroh kine ki la don lut ha ka Bill bad kane kan pynthikna ba ka Standard Procedure kan long kaba beit khnang ba ki nongjngohkai pyrthei kiba pyndonkam ïa ka Rope Way kin ïoh ïa ka jingshngaiñ bad ka jingïada, katba ki nongshong shnong ka jylla kin hap ban pyndonkam da kiwei pat ki jait Rope Way,” ong u Sangma.
Haba kylli hato ka Sorkar kan pyntreikam neem da ki Rope Way ban weng ïa ka jingdheng kali, u Myntri Rangbah u la ong ba ïa mynta ka Sorkar kam pat pyrkhat eiei halor kane watla ka don ka jingsngewkhia halor ka jingdheng kali kaba jur ha nongbah Shillong hynrei watla katta lada i donkam kyrkieh ka Sorkar kan sa wad ïa ki lad ki lynti.
Ka Kynhun Myntri ha kane ka sngi, ka la ïathir ïatai halor ka Meghalaya State Consumer Protection Mediation Rules da kaba leh katkum ki Rul jong ka Sorkar India.
“Ka jingthmu haba shna ïa kine ki Rul ka long ban pynthikna ba ki nongthied nongpet kin ïoh jingïada ha kaba yn sa pyntreikam ha ki District Level ha kaba ïa kino kino ki ujor barit baria yn sa pynbeit noh ha ki District Level ym shuh da ki Appellate Authority,”la ong u Myntri Rangbah.
“Ka jingwanrah ïa kane ka Rul kan long ban pynthikna ba ka jingbishar kan long kaba kloi namarba ïa kane ka Rule la mynjur da ka Sorkar India,” u la ong.
Ka Kynhun Myntri ka la ïathir ïatai ha kaba ïadei bad ka jingpynbeit thymmai katto katne halor ka Meghalaya Goods and Service Tax Ordinance, 2022 shwa ban rah ïatai ha ka Iingdorbar Thawaiñ ka Jylla.
“Ïa kine ki jingpynbeit kiba malu mala la leh katkum ka rai jong ka GST Council bad shisien ba ka Council ka la shim ïa ka rai, baroh ki Sorkar Jylla ruh kin hap ban wanrah ïa ki jingpynbeit thymmai ha Aiñ jong ka jylla,” la ong u Myntri Rangbah.
Ha kane ka jingïalang la tyrwa ban wanrah ïa ka Meghalaya Profession, Trade Calling and Employment Tax. “Kane ka dei tang ka Ordinance ïa kaba ngi ladep ïathir ha ka jingïalang Kynhun Myntri mynshwa bad ïa kaba yn sa rah ïatai ha ka Iingdorbar Thawaiñ,” la ïathuh u Sangma.
Sa kawei pat ka Ordinance kaba la wanrah ha ka jingïalang Kynhun Myntri ka dei halor ka The Meghalaya Fiscal Responsibility and Budget Management Act.
“Ïa kane ka Ordinance ba la pynbeit katto katne na ka bynta ban pynkiew ïa ka Fiscal Deficit na ka 3.5% sha ka 4% bad ïa kane la leh katkum ki kyndon bad ki jingbthah jong ka Ministry of Finance ka Sorkar India,” la ong u Myntri Rangbah.
