SHILLONG, Nailur 11: Ka Meghalaya ka la wanphai ïing da kaba khur 24 tylli ki takma ha ka lympung ïalehkai jong ka 1st Northeast Kun Bokator Championship kaba la sdang naduh ka 06 haduhn 07 tarik Nailur, 2025.
Kane ka Championship kaba ar sngi lynter la pynlong ha Dimoria College, Guwahati, ha kaba 29 ngut ki nongïalehkai (Athlete) jong ka jylla hapoh ka lama jong ka Meghalaya Kun Bokator Association [MKBA], ki la lah ban wanphai ïing ryngkat bad 24 tylli ki takma kiba kynthup ïa 14 tylli ki takma ksiar 8 tylli ki takma rupa bad 2 tylli ki takma rnong.
Kumta na ka liang jong ka MKBA, kaba dei ka synjuk ba dang shu thaw thymmai ha ka Jylla, ka kitbok kitrwiang ïa baroh ki nongjop bad kumjuh ruh ïa kiwei pat ki nongïalehkai ki bym shym la lah ban khur takma na ka bynta kane ka jingjop bad pynshlur ïa ki ba kin nang trei shitom ban leh ïa kaba bha tam ha ki lympung bad ki Championships ban sa wan.
ïa kane ka Championship la pynlong da ka Assam Kun Bokator Association hapoh ka jingpeit jong ka Kun Bokator Federation of India, kaba don ka jaka treikam jong ka ha Hyderabad, Telengana.
Kane ka lympung ka la pynïasoh lang ïa ki nongïalehkai ba kynsai bad kiba sngewtynnad ïa ka jingïalehkai martial art na kylleng ka thaiñ Shatei Lam Mihngi, ban pyni ïa ka bor, ka jinglong ryntih, bad ka jingïakylliang kolshor.
Kane ka lympung ym tang ba ka la pynpaw ïa ka mynsiem ïakhun hynrei ka pyni ruh ïa ka jingpynneh bad pynroi ïa ka rukom ïalehkai martial art naduh tynrai kaba pynïasoh ïa ki jaitbynriew lyngba ka pateng kaba ïasam bad ïatrei lang.
Ki nongïashim bynta ki la ïa aireng ha ki kyrdan bapher bapher, kynthup ïa ki rukom ïalehkai tynrai (traditional form), ka jingpyni ïa ki tiar ïaleh (weapon demonstration), bad ka full-contact sparring.
Da ka jingkyrshan ba shitrhem na ki nongpeitkai jong ka thaiñ, kane ka championship ka la pyni ïa ka jingaiti lut bad ka jingtbit jong ki samla ïalehkai kiba la kut jingmut ban buh ïa ka thaiñ shatei lammihngi ha ka map ïalehkai pyrthei.
Na ka liang jong ki nongpynïaid ki la pynksan ïa ka jingdonkam ban pynlong ïa kum kine ki rynsan sha ki khynnah ïalehkai ba dang samla, kaba ailad ïa ki ban ïoh ïa ka jingshai bad pynkhreh na ka bynta ki jingïakob kiba kham heh ha ka ri bad ha ka pyrthei.
Ka Kun Bokator ka dei ka jingïalehkai Martial Art tynrai kaba la sdang na Cambodia kaba la dep ban ithuh da ka “Olvmpic Council of Asia (OCA).
Da kane ka jingjop, ka Meghalaya ka dang ïai bteng, ban pynskhem ïa la ka jong ka kyrdan ha ka jingïalehkai martial art, da kaba pynshlur ïa ki samla kiba kham bun ban shim ïa ka Kun Bokator kum ka lynti sha ka jinglong ryntih.
