Shillong, Nailur 28 : Ka Meghalaya Basketball Association hapoh ka jingpeit jingkhmih jong ka Basketball Federation of India kan sa pynlong ïa ka lympung ïalehkai basketball kaba la tip kum ka 72nd Junior National Basketball Championship 2022. Katei ka lympung kaban neh saw sngi kan sdang naduh ka 14 tarik haduh ka 17 tarik u Risaw 2022 ha Indoor Basketball Court ha NEIGRIHMS.
Ïa katei ka lympung yn pynïalehkai da ka league system ha kaba ki lai ngut kiba bat kyrdan ba hakhlieh (men/women) kin ïoh ban rung sha ka jingïakhun final kaban sa long ha Bengaluru naduh ka 21 tarik haduh ka 28 tarik Nohprah 2022. Shwa ban sdang ka jingïalehkai yn pynlong shwa ka jingjied nongïalehkai jong ka kynhun ka jylla ba kynthup shynrang bad kynthei ha ka 1 tarik u Risaw 2022 ha JNS Basketball Court, Polo kaban sdang naduh ka por 6:30 baje mynstep bud pat sa ka jingai jinghikai kaban sdang naduh ka 3 tarik Risaw 2022.
Katkum ka kyrwoh na ka Meghalaya Basketball Association la pyntip ba ki nongïalehkai kiba lah ban ïashim bynta ha ka prokram jied nongïalehkai kidei tang kito kiba kha ha ka 01-01-2003 haduh 01-01-2006. Shuh shuh ki khynnah kin hap ban rah lang ryngkat ki syrnot sngikha, Adhar Card, ka admit card klas X ban pynshisha ïa ka sngikha.
