Shillong, Nohprah 11: Ka Assam Rifles ka la pynbna ban pynlong ïaka sienjam kaba san jong ka jingïakop mareh ‘Half-Marathon’ (5th Assam Rifles Half Marathon (ARHM) ha nongbah Shillong ha ka Sngi U Blei, ka 14 tarik Nohprah, 2025. Kane ka dei ka lympung ïakop mareh kaba heh tam jong ka thaiñ Shatei lammihngi.
La khmihlynti ba ka sienjam kaba san jong kane ka lympung mynta u snem 2025 kan don shibun ki nongïashim bynta namar ka jingpawnam kaba nang kiew jong kane ka lympung ha ka thaiñ Shatei Lammihngi bad ha kylleng ka Ri.
Mynta u snem la khmih lynti ïa ka jingïashim bynta da ki katto katne ki kynrem ki lyndan na ka Sorkar. Kumba ka long, ka Assam Rifles Half Marathon (ARHM) ka la nang kham pawnam shuh shuh man la u snem, bad la antad ba mynta u snem kin don palat 3000 ngut ki nongmareh ki ban ïashim bynta ha ki lai tylli ki kyrdan ïakop – kata ha ka 5 km, 10 km bad 21 km, naduh ka rta kaba 12 haduh 60+ snem shaneng.
Ki nongmareh na kylleng ka ri ym tang ba kin ïoh ïa ka lad ban mareh ha ka lynti kaba itynnad tam jong ka Upper Shillong hynrei kin ïakhun ruh ban ïoh khur ïa ka khusnam pisa kaba heh bha kaba T.20 Lak.
Kane ka jingïakop ka la kylla long ka jingrakhe ïa ka jingïamareh ba ki briew ki ap khmihlynti ha ka thaiñ Shatei Lammihngi bad la khmih lynti ba kan tam ïa baroh ki rekod ba la dep ha kaba ïadei bad ka jingbun ki nongïashim bynta. Ka Assam Rifles Half-Marathon ka thmu ban pynroi ïa ka kolshor jong ka jingkoit jingkhiah, ban don ïa ka met kaba shait kaba khlaiñ bad ka jingïatylli ha ka thaiñ Shatei Lammihngi. Kumta na ka liang jong ka Assam Rifles ka pdiang sngewbha bad ai mynsiem ïa iwei pa iwei i briew jong ka jaidbynriew ban ïashim bynta ha katei ka sngi.
Ka thong jong ka Marathon kam dei tang ban kyntiew ïa ka jingkoit jingkhiah bad ka jingïatreilang hapdeng ki shipai hynrei ban pynshlur ruh ïa ki paidbah ha ka jingïatylli bad ka jingthmu jong u Myntri Rangbahduh ka ri India, u Narendra Modi na ka bynta ka ri India kaba koit ba khiah bad kaba shait kaba khlaiñ.”
“Ka Assam Rifies ka ai khublei ruh ïa ki nongkyrshan ïa kane ka jingïakop mareh kata ka Indian Oil Corporation Ltd. SBI, YES Bank, IDFC First Bank, TATA Advanced Systems bad ka ISL kaba pynïaid ïa kane ka lympung ka ban sa long shen.
