SHILLONG, Jylliew 11: Ka Meghalaya Veteran Table Tennis Association [MVTTA], kan pynlong man la u snem ïa ka rynsan ïakop Table Tennis kaba la tip da ka Meghalaya Masters TT Team Championships, kumba long ha ki snem ba la dep ban kynmaw burom ïa ka sngi kyrpang jong ka mei mariang ha ka pyrthei lane ka World Environment Day.
Kane ka dei ka sien kaba hynñiew (7) ba ïa kane ka lympung la pynlong ha Polo Stadium Shillong. Mynta u snem kane ka lympung kan long ha ka sngi Saitjaiñ ka 14 tarik u Jylliew, 2025. Baroh ki nongïalehkai Table Tennis jong ki por mynshwa kiba la tip ïa ki kum ki ‘Masters’ na ki Distrik bapher bapher jong ka Jylla Meghalaya kin ïashim bynta kum ka kynhun.
Ki don 8 tylli ki kynhun ki ban ïashim bynta ban ïoh ïa ka burom kum ki lahduh, kata ka Go Green, Stay Fit, Save Fuel, Swachh Bharat, Save Trees, Save Water, Save Earth bad Protect Nature.
Ka jingsam khusnam kan long ha ka por 5 shiteng jan miet ha ka 14, Jylliew, 2025 hakhmat u Kongsan u Nababrata Bhattacharjee bad kiwei de ki rangbah ba donburom.
