1354 ngut kiba la ithuh kum ki ‘duplicate electors, 23 hajar tam kiba la ïap, pyntip u CEO

Shillong, Risaw 08: Ki la don haduh 1354 ngut kiba la ithuh kum ki ‘duplicate electors’, kiba la pynrung ïa ki kyrteng jong ki ha ki artylli ki jaka bad kumba 23161 ki nongthep vote ki dei kiba la khlad noh kat haduh ka 8 tarik mynta u bnai.
Ïa kane ka ïathuh da u chief electoral officer (CEO) ka jylla u BDR Tiwari haba pynbna ïa ka por na ka bynta ban pynlong ïa ka jinglum thup kaba kyrpang na ka bynta ban khmih bniah ïa ka electoral roll 2025 ha ka sngi ba-ar.
Na ki 22,41,984 ngut ki nongthep vote katkum ka 8 tarik mynta u bnai, kumba 21,79,106 ki nongthep vote la shem bad la lah ban pynshisha, ong u Tiwari sha ki lad pathai khubor.
U la ong ba ka jingleit ban pynshisha sha manla ki thliew ïing ka la kot sha ka 97.20%.
Kum shibynta na ka SSR 2025 exercise, na ka liang u CEO u la pynlong ïa ka jingïalang bad ki seng saiñ pyrthei ha ka sngi ba-ar. U la ong ba ki jingïalang bad ki seng saiñ pyrthei hapoh kamra u CEO bad ryngkatlang bad baroh ki district election officer (DEOs) yn ïai pynlong manla ka por tat haduh ban da pynmih ïa ka electoral roll kaba khatduh.
U la ong ba yn sa sam ei mar 2 kopi sha ki seng saiñ pyrthei ïa ki draft electoral roll bad kumjuh ruh ïa ki electoral roll ba la pyndep hadien ba ïa ka draft bad ka jingshon ïa ka electoral roll kaba khatduh ha ki jingïalang paidbah.
U Tiwari u la ong ba katkum ka policy kaba mynta jong ka Election Commission of India, ka Annual Summary Revision haba phai sha ka 1 tarik u Kyllalyngkot jong u snem ban wan kum ka tarik kaba biang la ju pynlong ha ki bynta ba hadien jong manla u snem ha baroh ki state/UT khnang ba ka jingpynmih ïa ka electoral roll kaba khatduh yn lah ban leh ha u taïew ba nyngkong jong u snem ba bud.
Katkum ki kyndon hapoh ka Section 14 jong ka Representation of People Act, 1950, kumba 4 tylli ki tarik ba la buh, ka 1 tarik u Kyllalyngkot, ka 1 tarik u Ïaïong, ka 1 tarik u Naitung bad ka 1 tarik jong u bnai Risaw, ki la don bad namar kata ka Annual Summary Revision la pynlong da kaba phai sha ka 1 tarik u Kyllalyngkot na ka bynta ka snem kaba bud kum ka tarik kaba la pynbiang.
“Ka Commission ka la rai ban pynlong ïa ka Annual Summary Revision da kaba phai sha ka 1 tarik u Kyllalyngkot, 2025 kum ka tarik kaba biang ha baroh ki jylla bad UT laitnoh ka jylla Haryana, Jharkhand, Maharashtra bad UT jong ka Jammu & Kashmir, naba ïa ki electoral roll la pynmih ha shwa ka National Voters’ Day, ka 25 tarik u Kyllalyngkot jong manla u snem khnang ba ïa ki EPIC jong ki nongthep vote ba thymmai khamtam kiba dang samla kiba ha ka rta 18-19 snem yn lah ban sam ha ka NVD,” u la ong.
Haba ong ba ki don ar kyrdan ban pynlong ïa ka revision exercise jong ka electoral roll, kaba ki khot da ka pre-revision bad ka kam revision, u CEO u la ong ba khnang ban ïoh ïa ki electoral roll kiba paka la pynlong ïa kine baroh.
Halor ka por ban pynlong ïa ka summary revision kaba kyrpang jong ka electoral roll 2025, u CEO u la ong ba hapoh ki kam pre-revision, ka jingleit pynshisha sha manla ki thliew ïing (H2H) lyngba ki BLO, ka jingpynkhreh ïa ki polling station, ka jingweng ïa ki jingbakla ha ka electoral roll/EPIC, kum ka nuksa ba don kiba la ïap, ki duplicate, ki nongthep vote ba la kynriah jaka bad kiwei bad ka jingpynbiang ïa ki dur kiba bha, ka la sdang naduh ka 20 tarik u Nailar bad kan kut ha ka 18 tarik u Risaw. Ka jingpynkhreh ïa ka draft roll da kaba phai sha ka 1 tarik u Kyllalyngkot, 2025 kum ka tarik ba la pynbiang yn pyndep noh ha ka 28 tarik u bnai Risaw.
Haba ïadei bad ki kam ban khmih biang ne revision, u la ong ba ka jingpynmih ïa ka draft electoral roll kan long ha ka 29 tarik mynta u bnai, ka por ban leit kam ne ban pynpaw ïa ki jingpyrshah kan long naduh ka 29 tarik u Risaw haduh ka 28 tarik u Naiwieng, ki tarik jong ka jingïalap kaba kyrpang lah dep ban buh kata ha ka 15 tarik bad 16 tarik u Naiwieng bad kumjuh ruh ha ka 21 bad 22 tarik u Naiwieng, bad ka jingweng ïa ki jingkam bad ki jingpyrshah kan long ha ka 24 tarik u Nohprah bad ka jingpynmih ïa ka electoral roll kaba khatduh kan long ha ka 6 tarik u Kyllalyngkot, 2025.