Kolkata, Naitung 26: Ka sien pynlong kaba 133rd jong ka lympung “IndianOil Durand Cup” kan sa sdang mynta ka sngi (27 tarik Naitung) ban plie pyrda ha ka Stadium kaba la pawnam bha ha India, ka Vivekananda Yuba Bharti Krirangan (VYBK), ha kaba ka lahduh ka ban ïada ïa ka burom- ka Mohun Bagan Super Giant (MBSG) kan aireng pyrshah ïa ka Downtown Heroes (Srinagar) na ka Group A, ka ban long ka jingïalehkai kaba nyngkong jong kane ka lympung mynta u snem. Kane ka jingïalehkai kan sdang ha ka por 6 baje nohphaisngi.
Ka Downtown Heroes FC, ka klob kaba ïakhun mynta la saw snem, ka wanrah ïala ki jong ki mat ha kane ka jingïakhun da kaba pynleit jingmut kham bun shah ban kyntiew ïa ki samla ka thaiñ kiba don ïa ka sap. Watla ka history jong ka kynhun ka long kaba lyngkot, hynrei ka la sdang ban ïalehkai ha ka Durand Cup ha ka samoi ba la dep bad ki la ïashimbynta ruh ha ka samoi 2022-23 jong ka I-League Division 2.
Katba ka Mohun Bagan SG ka jam sha kane ka lympung kum ka lahduh ka ban ïada ïa ka burom, kaba la pynpaw nam shuh shuh hadien ba ka la rah ïa ka ISL Shield ha ka samoi ba ladep.
Hapoh ka jingïalam jong u Jose Francisco Molina kum u Coach ba heh duh, ki thmu ban pynkhraw shuh ïa ka nam jong ka kum ki nongjop lyngba ka kynhun ki player ba kynsai kiba kynthup ïa u Jamie Maclaren, Greg Stewart, Alberto Rodriguez, bad u Tom Aldred.
La bna-nam ruh ba kane ka lahduh ka ju sdang jai jai ha ki jingïakhun ba nyngkong bad kan pyrshang katba lah ban wanrah ka jingkylla.
U kapten ka kynhun- u Basit Ahmed u la pynpaw ïa ka jingsngew skhem jingmut shuwa ban jam sha ka jingïakhun kaba nyngkong da kaba ong, “Ngi la long kiba la khreh ban wanrah jingkmen sha ki nongshong shnong bad baroh ki klob kiba na Kashmir haba ngi shimbynta ha kane ka Durand Cup mynta u snem. Ngi sngew kmen bad sngew sarong ban shimbynta ha kane ka lympung kaba pawnam bad Ngi la trei shitom ban aiti lut kat kaba Ngi don.”
Lah ban kdew ba ha ka sien ba nyngkong ïa ka Durand Cup kaba 133rd yn pynïalehkai ha saw tylli ki nongbah, ha kaba ka Shillong bad ka Jamshedpur kin pynlong ïa ki jingïalehkai ha ka sien ba nyngkong, kiwei pat ki nongbah ki long ka Kokrajhar bad Kolkata kiba la ju ïoh pynlong barabor.
Baroh ki don 24-tylli ki kynhun kiba la phiah sha ki hynriew tylli ki Group, ka Groups A, B bad C yn pynlong ha Kolkata katba ka Group D, E bad F yn pynlong ha Jamshedpur, Kokrajhar bad ha Shillong marïabud.
Ki lahduh na man ki Group bad ar tylli ki kynhun ba wan kyrdan ba ar ba kham kynsai kin ïoh rung sha ka quarterfinal ba la pynkhreh ban pynïakhun ha Kokarajhar bad Jamshedpur, nalor ka Kolkata.
