Khliehriat, Nailur, 29: Ha East Jaiñtia Hills District ki don khat lai tylli ki pandal puja kiba na ka bynta ka jingleh niam jong ki riew ngeit Hindu kaba yn sdang naduh ka 29 tarik u bnai nailur 2025 bad yn pynkut ha ka 2 tarik u risaw 2025, kane ka jingleh niam jong ki riew ngeit Hindu ka dei ka Sarvajanik Shree Shree Durga Utsav kaba ju tip ruh kum ka Durga Puja.
Ki Puja pandal kiba yn pyndep ïa ka jingleh niam ki don ha Khliehriat, Sookilo, Ladrymbai Khliehdupon, Ladrymbai Datsimpeiñ, Jalyiah, Umpleng, kumjuh ruh hapoh company Topcem, Dalmia, Star Cement, Goldstone, Green Valley Cement Ltd, ha Amrit Cement bad ha Hills Cement (Taj), hapoh kine ki pandal ki riew ngeit Hindu kin pyndep ïa ki jing leh niam jong ki ha kitei ki sngi bad ha ka 2 tarik pat kin pynlong ïa ka jingleit bret ïa ki jingkñia bad ki blei.
Khnang ba kan nym don kano kano ka jingktah ïa ka mariang ha ka khuid ka suba, na ka bynta ka jingleit bret ïa ki jingkñia bad ki blei kiba napoh kitei ki pandal kaba yn leh ha ka 2 tarik u risaw, na ka liang ki bor district jong ka East Jaiñtia Hills District bad na ka liang ki company dewbilat kiba don hapoh ka district ki la dep pynkhreh ïa ki jaka bad shna ïa ki pung ba rit ban bret ïa ki blei bad jingkñia, na ka bynta ki jingkñia bad ki blei kiba napoh ka pandal kaba don ha Umpleng yn bret ha ka jaka ba la pynkhreh kaba don ha ka thaiñ Umpleng hi, na ka bynta ki pandal kiba na Khliehriat, Sookilo, Ladrymbai Khliehdupon, Ladrymbai Datsimpeiñ, Jalyiah la pynkhreh ïa ka jaka hajan ka Ladrymbai Bypass kaba don hajan ka hotel East Side Inn bad ki jingkñia, ki blei kiba na ki puja pandal kiba napoh ki company dewbilat pat kin bret ha la ki jong ki jaka ba ki la pynkhreh hapoh ki company jong ki hi.
