Jowai, Nailar 10: Ka lympung ïalehkai phutbol Independence Day Cup Under-17 Football Tournament 2022 ba la pynïaid da ka West Jaiñtia District Sports Association (WJDSA), kala jam noh sha ka jingïakhun ‘Semi Final’ ha ka 13 tarik mynta u bnai ha madan Kiang Nangbah Stadium, Jowai. Haba phai sha ka jingïakhun ‘Quarter Final’ kaba la long mynta ka sngi ka Lumpariat kala lah ban pynliem da 3-0 kol ïa ka Dulong. Ïa ki kol la thep da u Pynskhem Dkhar haka minit ba 3 bad u Damehi Dkhar ha ka minit ba 18 & 54.
Ha ka jingïakhun kaba ar ka Mookyrdup kala jop da 2-1 kol ïa ka Dongmihsngi. Ka jingïakhun ba lai na ka liang ka Luti Tuber Ialong kala pynliem da 3-0 kol ïa ka Saiñdur Mihmyntdu, katba ha ka jingïakhun kaba saw lyngba ka jingïashut Tie Breaker ka kynhun jong ka Sailung Ialong kala jop da 3-1 kol ïa ka Mulang Ialong.
Ka jingïakhun ‘Semi Final’ kan long ha ka 13.08.2022 (Saturday) ha kaba ka kynhun ïalehkai jong ka Lumpariat kan ïakhun pyrshah ïa ka Luti Tuber Ialong ha ka por 1 baje shiteng nohphai sngi bad ka Mookyrdup pyrshah ïa ka Sailung Ialong ha ka por 3 shiteng janmiet.
