Tura, Nailar 4 : Ha ka miet Sngi Balang 3 tarik mynta u bnai ha ka por kumba 8.30 pm ha ka jingdum jongka miet, la wan thom bor ki hati khlaw ha ka shnong Borogobal kaba hap hapoh ka Tikrikilla Police Station bad ha ka jingpynjulor ïa kawei ka ïing ki la kyrdem iap ruh ïa uwei u rangbah u Amin Raibak Rabha uba la 50 snem ka rta.
La ïathuh shi kynhun ki hati khlaw ki la wan thombor ha ktei ka shnong kaba hap ha ka Raksamgre Constituency, West Garo Hills bad ym tang ba ki pynjulor ïa ki ïing ki sem hynrei ki la kthong ruh ïa ki nongshong shnong.
Ki nongshong shnong kiba la her syrngiew ïa kane ka jingwan thombor jong ki hati ki la phet krad na ka shnong bad phet rieh kat shaba lap ba shem U Amin Raibak Rabha u dei u rangbah uba paw bad long nongialam ia ka shnong hynrei kane ka jingshah pyniap jongu ha kine ki hati ka la long ka jingduh kaba khraw ïa ka ïing ka sem jongu khamtam ïa ka shnong ka thaw.
