Shillong, Nohprah 13 : Ka Sorkar Jylla hynne ka sngi ba-ar ka la rai ban kyrshan pisa ïa ki 12 tylli ki College jong ki riew paidbah (People’s College) kiba don ha kylleng ki jaka jong ka Jylla.
ïa kane ka rai la shim da ka Kynhun Myntri ka Sorkar Meghalaya Democratic Alliance (MDA) kaba shong jingïalang hynne ka sngi.
Hadien ba pynïaid ïa ka jingïalang, u Myntri Rangbah u Conrad K Sangma ula ong “ Katto katne ki Post yn sa bei tyngka da ka Sorkar. Ngin siew ma ngi ïa ki Nonghikai, ki lecturer bad katto katne na ki Nongtrei ha kine ki College”.
Kine ki 12 tylli ki College ki kynthup ïa ka : Thomas Jones Synod College, Jowai (West Jaintia Hills), Abongnoga College, Tura (West Garo Hills, Khrawsing Christian College, Mawphlang (East Khasi Hills), Riwar College, Pynursla (EKH), Loyala College, Williamnagar (East Garo Hills), Balawan College, Umsning (Ri Bhoi), Mawsynram Border Area College, Mawsynram (EKH), Selsella College, Selsella (WGH), Seng Khasi College, Jaiaw (Shillong), Mendipathar College, Mendipathar (North Garo Hills), Sngap Sing College, Mawkyrwat (South West Khasi Hills) bad Tikrikilla College, Tikrikilla (WGH).
U Myntri Rangbah u pyntip ba ka jinghap pynlut pisa haba pyntreikam ïa kane ka rai jong ka Sorkar kan kot kumba T. 17.94 klur shisnem bad T.1.5 klur ban pynlut manla u bnai.
U Conrad ula ong ba kane ka rai kan ïarap ruh shibun ruh ha kaban weng ïa ka jingeh na ka jingbym ïoh rung klass jong ki Samla Pule ha ki College bapher bapher.
“Ngi ïohsngew manla u snem ïa ki jingeh ba ki samla pule kim ïoh rung klass ha ki College ba duna ki seat, na kata ka daw, ngi la shim ïa kane ka rai kat kum ka jingkular jong ka Sorkar ïa ki paidbah ba kan buh hakhmat eh ïa ka kam ban kyntiew ïa ka pule ka dangle” ula ong.
“Namar kata, lada phi peit mynta ha ka Jingïalang jong ka Kynhun Myntri, kiba bun ki mat ki dei kiba ïadei bad ka pule puthi. Da kine ki rai ba ngi shim, jan kot T. 40 klur tam ka pisa ban hap pynlut, kan leit sha ka pule ka dangle. Na kata ka daw, kane ka dei kawei ka dak ba kumno ngi kum ka Sorkar ngi la shimkhia ïa ka pule ka dangle bad buh hakhmat eh” ula bynrap.
